నిరసనలతో భగ్గుమన్న ఇండోనేషియా- 20 మంది మృతి

జాతివివక్ష వ్యాఖ్యల నేపథ్యంలో ఇండోనేషియాలోని పపువా రాష్ట్రం భగ్గుమంది. వందలాది నిరసనకారులు రోడ్డుపైకి వచ్చి నివాసాలకు, దుకాణాలకు నిప్పింటించారు. ఆందోళనల్లో ఇప్పటి వరకు 20 మంది మృతి చెందారు. మరో 70 మంది తీవ్రంగా గాయపడ్డారు.

ఇండోనేషియాలో నిరసనలు భగ్గుమన్నాయి. పపువా రాష్ట్రంలోని వామెనా నగరంలో విజృంభించిన వందలాది ఆందోళనకారులు.. స్థానిక ప్రభుత్వ భవనాలు, దుకాణాలు, నివాసాలకు నిప్పింటించారు. ఈ ఘటనలో 20మంది ప్రాణాలు కోల్పోయారు. 70 మంది తీవ్రంగా గాయపడ్డారు. ఓ విద్యార్థినిపై ఉపాధ్యాయుడు జాతి వివక్ష వ్యాఖ్యలు చేశాడన్న ఆరోపణలతో నిరసనలు మొదలయ్యాయి.

స్వల్ప కాలంలోనే ఈ ఆందోళనలు పరిసర ప్రాంతాలకు వ్యాపించాయి. పపువా రాజధాని జయపురాలో జరిగిన నిరసనల్లో ఓ సైనికుడితో పాటు మరో ముగ్గురు ప్రాణాలు కోల్పోయారు. ఐదుగురి పరిస్థితి విషమంగా ఉందని అధికారులు తెలిపారు.

అయితే ఈ విషయంపై దర్యాప్తు చేపట్టిన పోలీసులు... ఉపాధ్యాయుడు జాతి వివక్ష వ్యాఖ్యలు చేసినట్టు ఆధారాలు లభించలేదని తెలిపారు. ఇతర పాఠశాలల్లో, ప్రాంతీయ సంఘాల్లో.. కొందరు అసత్యాలను వ్యాపింపజేస్తున్నారన్నారు. నిరసనలు సృష్టించడానికే ఎవరో ఇదంతా చేసినట్లు పోలీసులు వెల్లడించారు.

ఇదీ చూడండి:సరస్సులో స్ట్రా వేసి నీళ్లు తాగిన టోర్నడో!