రైతులు ఘోషిస్తున్నారు.. పట్టించుకోండి: రాహుల్

దేశంలో రైతుల పరిస్థితి దయనీయంగా ఉందని కాంగ్రెస్ అధ్యక్షుడు రాహుల్ గాంధీ ఆరోపించారు. రుణమాఫీని అమలు చేసేందుకు ఆర్బీఐ అనుమతించేలా కేంద్రం ఆదేశించాలని లోక్​సభలో కోరారు. అయితే ఈ పరిస్థితి ఏర్పడటానికి కారణం కాంగ్రెస్​ ప్రభుత్వమేనని రక్షణ మంత్రి రాజ్​నాథ్​ సింగ్ ఆరోపించారు.

ఆర్బీఐ అనుమతులు లేక రాష్ట్రాల్లో రుణమాఫీ సాధ్యం కావటం లేదని కాంగ్రెస్ అధ్యక్షుడు రాహుల్ గాంధీ ఆరోపించారు. ఫలితంగా రైతులు ఆత్మహత్యలకు పాల్పడుతున్నారని ఆవేదన వ్యక్తం చేశారు. లోక్​సభలో ప్రశ్నోత్తరాల సమయంలో కేరళలోని వాయనాడ్​లో రైతుల పరిస్థితిని ఉదహరించి కేంద్రంపై విమర్శలు గుప్పించారు రాహుల్.

"దేశంలో రైతుల పరిస్థితి దుర్భరంగా ఉంది. కేరళలో రైతుల పరిస్థితిని ప్రభుత్వం దృష్టికి తీసుకురావాలని అనుకుంటున్నా. ఒక్క వాయనాడ్​లోనే 8వేల మంది రైతులు రుణాలు చెల్లించాల్సి ఉంది. అప్పు చెల్లించాలని బ్యాంకులు ఒత్తిడి తెస్తున్నాయి. ఆస్తులు జప్తు చేస్తున్నాయి. ఇదే అక్కడ ఆత్మహత్యలకు కారణమవుతోంది. కేరళ ప్రభుత్వం ప్రకటించిన రుణమాఫీని అంగీకరించాలని ఆర్బీఐకి కేంద్రం సూచించాలని నా విజ్ఞప్తి.

ఈ 5 ఏళ్లలో వ్యాపార వేత్తలకు 4.3 లక్షల కోట్లు పన్ను రాయితీలు, 5.5 లక్షల కోట్ల రుణాలు మంజూరు చేసింది. ఎందుకు ఈ రెండు నాలుకల ధోరణి. రైతుల వృద్ధికి సంబంధించి ఈ బడ్జెట్​లో ఎలాంటి దృఢమైన నిర్ణయం తీసుకోకపోవటం బాధాకరం."
-రాహుల్ గాంధీ, కాంగ్రెస్ అధ్యక్షుడు

మీరే కారణం: రాజ్​నాథ్​

రాహుల్ గాంధీ వ్యాఖ్యలను తప్పుబట్టారు రక్షణ మంత్రి రాజ్​నాథ్​ సింగ్. భాజపా ప్రభుత్వం వచ్చాక రైతుల ఆత్మహత్యలు తగ్గాయని తెలిపారు. రైతుల కోసం చాలా చేశామనీ, అయితే చేయాల్సింది ఇంకా ఎంతో ఉందన్నారు.

"రైతుల పరిస్థితి ఈ నాలుగు ఐదేళ్లలోనే ఏర్పడింది కాదు. వాళ్లు కొన్నేళ్లపాటు చేసిన పాలనతోనే రైతులకు ఈ దుస్థితి ఏర్పడింది. ఇందుకు వాళ్లే బాధ్యులు. మోదీ ఆధ్వర్యంలో ప్రభుత్వం ఏర్పడినప్పటి నుంచి రైతుల ఆదాయం రెండింతలు చేసేందుకు ప్రయత్నిస్తున్నాం. స్వాతంత్ర్యం వచ్చినప్పటి నుంచి రైతులకు పెట్టుబడి సాయం అందిస్తోన్న మొదటి ప్రధాని మోదీనే."

-రాజ్​నాథ్​ సింగ్​, రక్షణ శాఖ మంత్రి