YSRCP Activist Suicide Attempt in Macherla పార్టీని నమ్ముకుని సర్వనాశనం అయ్యా! రోడ్డుపై వైసీపీ కార్యకర్త ఆత్మహత్యాయత్నంతో ఆందోళనకు గురైన ప్రయాణికులు - మాచర్లలో వైసీపీ కార్యకర్త ఆత్మహత్యాయత్నం

YSRCP Activist Suicide Attempt in Macherla: వైసీపీని నమ్ముకుని రోడ్డున పడ్డానంటూ.. పల్నాడు జిల్లా మాచర్లలో వైసీపీ కార్యకర్త ఆత్మహత్యకు యత్నించారు. వైసీపీని నమ్ముకుని తన కుటుంబం రోడ్డున పడిందని.. తనలా ఇంకెవరు బలి కావద్దంటూ ఆ పార్టీ కార్యకర్త గోపి బలవన్మరణానికి యత్నించారు. ఎమ్మెల్యే పిన్నెల్లి సోదరులతో పాటు మాజీ మున్సిపల్ ఛైర్మన్ తురకా కిషోర్​ని నమ్మినందుకు తన జీవితం నాశనం అయిందని ఆవేదన వెలిబుచ్చారు. పార్టీలో తనకు జరిగిన అన్యాయాన్ని వివరిస్తూ.. ఆర్టీసీ బస్టాండ్ ఎదుట తన ద్విచక్ర వాహనానికి పెట్రోల్ పోసి నిప్పంటించాడు. దాదాపు 20 నిమిషాల పాటు కేకలు వేస్తూ తీవ్ర ఆగ్రహం వ్యక్తం చేశారు. ఆ తర్వాత తన ఒంటిపైనా పెట్రోల్ పోసుకున్నాడు. ఆత్మహత్యకు యత్నించిన గోపిని పోలీసులు అడ్డుకుని అదుపులోకి తీసుకున్నారు. దీంతో ఘటనా స్థలంలో ఉద్రిక్తత వాతావరణం చోటుచేసుకుంది. ప్రస్తుతం ఇది మాచర్ల పట్టణంలో తీవ్ర చర్చకు దారితీసింది. ఎప్పుడూ ఎమ్మెల్యేతో పాటు తురకా కిషోర్ వెంట తిరిగే గోపి ఇలా చేయటంపై పార్టీ శ్రేణులు ఆవేదన వ్యక్తం చేస్తున్నారు.