భూ వివాదంలో మైనార్టీపై దాడి చేసిన వైసీపీ నాయకులు - చికిత్స పొందుతున్న బాధితుడు - గుంటూరు జిల్లా వార్తలు

YCP Members Attack minority community person :పొలం వివాదంలో మైనార్టీ వర్గానికి చెందిన ఓ వ్యక్తిపై.. వైసీపీ వర్గీయులు దాడి చేశారు. గుంటూరుకు చెందిన బాజీ అనే వ్యక్తి.. ఫిరంగిపురం మండలం అమీనాబాద్​లో 2019లో రెండు ఎకరాల పొలం కొన్నాడు. ఈ పొలం వివాదంలో ఉండటంతో అధికారులు.. పట్టా పుస్తకం ఇవ్వలేదు. అన్ని రకాల పత్రాలు ఉన్నా.. డీసీసీబీ ఛైర్మన్ లాలుపురం రాము వల్లే తనకు పట్టా పుస్తకం రాలేదని బాజీ ఆరోపించాడు. ఈ విషయంపై బుధవారం (నవంబరు 29న).. ఫిరంగిపురం తహశీల్దారు కార్యాలయానికి కలెెక్టర్​ వస్తున్నారనే విషయం తెలిసి ఫిర్యాదు చేయటానికి వెళ్లాడు బాజీ.

కలెక్టర్​ రాకపోవడంతో ఇంటికి తిరిగి వెళ్తుండగా.. నగర శివార్లలోని నల్లపాడు ఎకో పార్కు వద్ద ఇద్దరు వ్యక్తులు బాజీపై దాడి చేశారు. దాడిలో గాయపడిన బాజీ ప్రస్తుతం గుంటూరులోని జీజీహెచ్​లో చికిత్స పొందుతున్నారు. తనపై దాడి జరిగిందని నల్లపాడు పోలీసు స్టేషన్​లో బాజీ ఫిర్యాదు చేశారు. డీసీసీబీ ఛైర్మన్​ లాలుపురం రాము అనుచరులు దాడి చేసినట్లు ఫిర్యాదులో పేర్కొన్నారు. 2020 నుంచి వివాదం జరుగుతోందని.. గతంలో కూడా ఇలానే బెదిరించారని బాజీ ఆరోపించారు. అధికారం ఉందన్న అండతోనే.. మైనార్టీ వర్గానికి చెందిన తనపై దాడి చేశారని ఆవేదన వెలిబుచ్చారు.