Vundavalli Sridevi Comments on YSRCP: వైసీపీ కోసం ఎంతో కష్టపడ్డా.. అయినా రోడ్డున పడేశారు: ఎమ్మెల్యే ఉండవల్లి శ్రీదేవి - Vundavalli Sridevi Comments on CBN

Vundavalli Sridevi Comments on YSRCP: అమరావతి రైతులకు వైసీపీ బహిష్కృత నేత తాడికొండ ఎమ్మెల్యే ఉండవల్లి శ్రీదేవి ఆమె మద్దతు తెలిపారు. రాజధాని అమరావతిలోనే ఉంటుందని చెప్పి.. రాజధాని రైతులను తాను కూడా మోసం చేసినట్లు ఆమె వివరించారు. టీడీపీ జాతీయ ప్రధాన కార్యదర్శి నారా లోకేశ్​ చేపట్టిన యువగళం పాదయాత్రలో.. ఎమ్మెల్యే ఉండవల్లి శ్రీదేవి పాల్గొన్నారు. అమరావతి ఆవేదన పేరుతో రాజధాని రైతులతో లోకేశ్​ సమావేశం నిర్వహించగా.. ఈ కార్యక్రమానికి శ్రీదేవి వ్యాఖ్యాతగా వ్యవహరించారు. ఈ సందర్భంగా ఆమె మాట్లాడుతూ భావోద్వేగానికి లోనయ్యారు. శ్రీదేవి ఎలా తిరుగుతుందో చూస్తామని కొందరు అన్నారని.. ఈ కార్యక్రమానికి అహ్వానించి లోకేశ్​ కొండంత భరోసానిచ్చారని అన్నారు. వైసీపీ కోసం తాను ఎంతో కష్టపడ్డానని.. అయినప్పటికీ రోడ్డున పడేశారని ఆవేదన వ్యక్తం చేశారు. కార్యకర్తలతో ఫోన్లు చేయించి.. అనేక విధాలుగా వేధించారని కంటతడి పెట్టుకున్నారు. నేను లోకేశ్​ను ఎప్పుడూ చూడలేదని.. ఆయన నాకు మద్దతిస్తానని అన్నారని వివరించారు. అందుకు లోకేశ్​కు మనస్పూర్తిగా కృతజ్ఞతలు తెలియజేస్తున్నానని సంతోషం వ్యక్తం చేశారు. అమరావతి అంటే చంద్రబాబు, లోకేశ్​ అని అన్నారు. అమరావతి రైతులు ధైర్యంగా ఉండాలని.. వారిద్దరూ ఎట్టి పరిస్థితుల్లోనూ రైతుల వెన్నంటే ఉంటారని స్పష్టం చేశారు.