Volunteers argue with Sarpanch: రెచ్చిపోయిన వైసీపీ నాయకులు, వాలంటీర్లు.. మహిళా సర్పంచ్​తో వాగ్వాదం - విశ్వేశ్వరాయపురంలో జగనన్న సురక్ష కార్యక్రమం

YSRCP Leaders and Volunteers Fight with Woman Sarpanch in Visweswarayapuram: జగనన్న సురక్ష కార్యక్రమంలో ఓ మహిళా సర్పంచ్​పై గ్రామ వాలంటీర్ వాగ్వాదానికి దిగారు. కోనసీమ జిల్లా మలికిపురం మండలం విశ్వేశ్వరాయపురంలో సర్పంచ్ చెల్లుబోయిన హెలీనా అధ్యక్షతన జగనన్న సురక్ష కార్యక్రమం జరిగింది. ఈ కార్యక్రమంలో మాట్లాడిన మహిళ సర్పంచ్.. కొంత మంది వాలంటీర్ల కారణంగా అర్హత కలిగిన కొంతమందికి సంక్షేమ పథకాలు అందటం లేదని ఆరోపించారు. ఈ క్రమంలో వాలంటీర్ మున్నా సభావేదిక వైపు దూసుకొచ్చి పథకాలు ఎవరికి అందలేదో చెప్పాలంటూ సర్పంచ్​తో వాగ్వాదానికి దిగారు. అతనితో పాటు మిగతా వాలంటీర్లు, వైఎస్సార్సీపీ నాయకులు తోడవడంతో ఉద్రిక్త వాతావరణం ఏర్పడింది. కావాలనే టీడీపీ సానుభూతిపరులకు పథకాలు అందకుండా అడ్డుకుంటున్నారని ఆమె ఆగ్రహం వ్యక్తం చేశారు. ఈ కార్యక్రమంతో పంచాయతీకి సంబంధం ఏంటని ఓ వైసీపీ నాయకుడు ప్రశ్నించారు. సచివాలయం పంచాయతీ పరిధిలోకే వస్తుందని సర్పంచ్​ సమాధానం ఇచ్చారు. దీనిపై కొంతమంది వాలంటీర్లపై గతంలోనే అధికారులకు ఫిర్యాదు చేశానని సర్పంచ్ చెప్పారు. దీంతో కొంతసేపు సభ రసాభాసగా మారింది. ఈ నేపథ్యంలో ధ్రువపత్రాలు పంపిణీ ప్రారంభించేందుకు సర్పంచి అంగీకరించలేదు. పంచాయతీ కార్యదర్శి కలుగజేసుకుని సర్దుబాటు చేయడంతో కార్యక్రమం కొనసాగింది.