Road Accident in Kadapa: విధి నిర్వహణలో ప్రాణాలు విడిచిన ఇద్దరు ఉద్యోగులు.. మృతుల్లో ఆర్టీవో.. - news updates in ap

Today Road Accident in Kadapa: కడప శివారులోని అలంఖాన్ పల్లె కూడలి వద్ద ఇవాళ తెల్లవారుజామున ఘోర రోడ్డు ప్రమాదం జరిగింది.  ఈ ప్రమాదంలో విధులు నిర్వహిస్తున్న బ్రేక్ ఇన్​స్పెక్టర్​ శివప్రసాద్​తో పాటు సహాయకుడు కేశవ్ అక్కడికక్కడే దుర్మరణం చెందారు. ఈ ఘటన స్థానికులను కలిచివేసింది. ప్రమాద విషయం తెలుసుకున్న జిల్లా రవాణా శాఖ అధికారులు హుటాహుటిన ఘటనా స్థలాన్ని పరిశీలించారు. విధి నిర్వహణలో భాగంగా ఇవాళ తెల్లవారుజామున బ్రేక్ ఇన్​స్పెక్టర్​ శివప్రసాద్, సహాయకుడు కేశవ్ ఇద్దరు అలంఖాన్ పల్లె కూడలి వద్ద వాహనాల తనిఖీలు నిర్వహిస్తున్నారు. ఈ క్రమంలో చెన్నూరు వైపు నుంచి వస్తున్న ఓ లారీ డివైడర్​ను ఢీకొట్టింది. ఆ లారీని తప్పించబోయే ప్రయత్నంలో కమలాపురం వైపు నుంచి వస్తున్న టిప్పర్.. రోడ్డు పక్కన విధులు నిర్వహిస్తున్న బ్రేక్ ఇన్​స్పెక్టర్​, అతని సహాయకుడు కేశవ్​లను ఢీకొట్టడంతో ఇద్దరు అక్కడికక్కడే దుర్మరణం చెందారు. విషయం తెలుసుకున్న ఇన్​ఛార్జ్​ డీటీసీ నిరంజన్​రెడ్డి ఘటనా స్థలాన్ని పరిశీలించారు. మృతదేహాలను పంచనామా నిమిత్తం ప్రభుత్వ సర్వజన ఆస్పత్రికి తరలించారు. మృతుల బంధువులు కన్నీరు మున్నీరుగా విలపించారు. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు.