వైసీపీ, టీడీపీ శ్రేణుల ఘర్షణ - పెదనందిపాడులో లాఠీచార్జ్, 144సెక్షన్ - పెదనందిపాడులో టీడీపీ వైసీపీ ఫ్లెక్సీ వార్

TDP YCP Activists Clash in Guntur District: ఫ్లెక్సీ తొలగింపు వ్యవహారం టీడీపీ, వైసీపీ వర్గీయుల మధ్య ఘర్షణకు దారి తీసింది. గుంటూరు జిల్లా పెదనందిపాడులో ఫ్లెక్సీ తొలగింపు వ్యవహారం వైసీపీ, టీడీపీ శ్రేణుల మధ్య ఘర్షణకు దారి తీసింది. ముక్కోటి ఏకాదశి ఏర్పాట్ల నిమిత్తం పాతబస్టాండ్‌ కూడలిలోని రామాలయం వద్ద ఉన్న వైసీపీ ఫ్లెక్సీని ఆలయ కమిటీ సభ్యులు తొలగించారు. 

ఈ చర్యతో ఆలయ కమిటీ సభ్యులతో వైసీపీ నాయకులు వాగ్వాదానికి దిగారు. తొలగించిన ఫ్లెక్సీని తిరిగి అదే స్థానంలో ఏర్పాటు చేసేందుకు యత్నించారు. వేరే ప్రాంతంలో ఫ్లెక్సీని కట్టుకోవాలని సభ్యులు చెప్పారు. అయితే రహదారి పక్కన ఉన్న టీడీపీ ఫ్లెక్సీలను తొలగించాలని వైసీపీ నాయకులు పట్టుబట్టారు. అక్కడే ఉన్న టీడీపీ నాయకులతో వైసీపీ వర్గీయులు ఘర్షణకు దిగారు. గ్రామంలో ఉన్న అన్ని ఫ్లెక్సీలను తొలగించాలని టీడీపీ నాయకులు డిమాండ్ చేశారు. దీంతో పెదనందిపాడులో ఉద్రిక్త పరిస్థితి నెలకొంది. సమాచారం అందుకున్న పోలీసులు ఘటనా స్థలానికి చేరుకుని ఇరువర్గాలను లాఠీలతో చెదరగొట్టారు. ఆలయం వద్దనున్న వైసీపీ, టీడీపీ ఫ్లెక్సీలను తొలగించారు. పెదనందిపాడులో 144 సెక్షన్‌ విధించారు.