ayyanna patrudu speech: 'మరోసారి జగన్ గెలిస్తే.. మన కిడ్నీలను సైతం అమ్మేస్తాడు'

ayyanna patrudu speech in Mahanadu 2023: నాలుగేళ్లుగా ప్రతిపక్షాలను జగన్ ఇబ్బంది పెడుతున్నారని మాజీ మంత్రి అయ్యన్న పాత్రుడు ధ్వజమెత్తారు. ప్రపంచంలో తెలుగువారి గౌరవాన్ని పెంచింది ఎన్టీఆర్‌ అని కొనియాడారు. నటనలో ఎన్టీఆర్‌కు సాటి మరెవరూ లేరని.. ఏ పాత్రలో నటించినా అందులో లీనమయ్యే వ్యక్తి ఎన్టీఆర్‌ అని చెప్పుకొచ్చారు. జగన్ పాలనలో ఎక్కడ చూసినా దోపిడీ రాజ్యమేలుతోందని.. పింఛను 3 వేల రూపాయలు ఇస్తానని చెప్పి మోసం చేశారని అయ్యన్న దుయ్యబట్టారు. జగన్మోహన్​రెడ్డి ఎన్ని ఇబ్బందులు పెట్టినా కార్యకర్తలు తమతోనే ఉన్నారని స్పష్టం చేశారు.

25 లక్షల ఇళ్లు ఇస్తానని చెప్పి ఒక్క ఇల్లు కూడా జగన్మోహన్ రెడ్డి ప్రభుత్వ హయాంలో కట్టలేదని.. జగన్ పాలనలో ఏ మంత్రికీ విషయ పరిజ్ఞానం లేదని అయ్యన్న పాత్రుడు విమర్శించారు. మన పిల్లల భవిష్యత్తు కోసం మళ్లీ టీడీపీ రావాలని.. ప్రతి ఒక్కరూ చంద్రబాబును గెలిపించుకోవాలని కార్యకర్తలకు పిలుపునిచ్చారు. జగన్ పాలనలో ఇప్పటికే రాష్ట్రం సర్వ నాశనమైందని, మరోసారి జగన్​ వస్తే.. ప్రజల కిడ్నీలను సైతం అమ్మేస్తారని విమర్శించారు.