Sri Krishnashtami celebrations in State: వైభవంగా శ్రీకృష్ణాష్టమి ప్రత్యేక పూజలు.. శ్రీకృష్ణుడు వేషధారణలో 108 మంది చిన్నారులు - 108 children dressed as Lord Krishna

Sri Krishnashtami Celebrations in State :రాష్ట్రంలో పలుచోట్ల ఆలయాల్లో శ్రీకృష్ణాష్టమి ప్రత్యేక పూజలు నిర్వహించారు. గోపూజలు, ఉట్టికొట్టే కార్యక్రమాలు ఉత్సాహభరిత వాతావరణంలో సాగాయి. చిన్నారులు రాధాకృష్ణుల వేషధారణలతో ప్రత్యేక ఆకర్షణగా నిలిచారు. విజయవాడ ఇంద్రకీలాద్రిపై దుర్గామల్లేశ్వరస్వామి దేవస్థానం రుక్మిణీ సత్యభామ సమేత కృష్ణునికి షోడశోపచార పూజలు జరిపారు. ఇస్కాన్ ఆధ్వర్యంలో జగన్నాధ మందిరంలో రాధా కృష్ణులకు వైభవోపేతంగా కలశ అభిషేకం, ఊంజల్‌ సేవ నిర్వహించారు. విజయవాడ ఇస్కాన్ మందిర అధ్యక్షుడు చక్రధారి దాసు పర్యవేక్షణలో కృష్ణుడికి విశేష హారతులు, కీర్తనలతో పాటు 108 రకాల పిండివంటలతో భోగా అర్పించారు. 

జగ్గయ్యపేట పట్టణంలో శ్రీ కృష్ణాష్టమి పురస్కరించుకొని సంతాన వేణుగోపాలస్వామి వారి దేవస్థానంలో స్వామివారి ఊరేగింపు కార్యక్రమం, తీర్థప్రసాదాల పంపిణీ కార్యక్రమాన్ని నిర్వహించారు. స్వామివారిని దర్శించుకునేందుకు దేవాలయంలో భక్తులు పోటెత్తారు

108 Children Dressed as Lord Krishna : కాకినాడ జిల్లా అన్నవరం శ్రీ వీర వెంకట సత్యనారాయణ స్వామి దేవస్థానం లో శ్రీకృష్ణాష్టమి సందర్భంగా ఘనంగా వేడుకలు జరిగాయి. సప్త గోపూజ నిర్వహించారు. 108 మంది చిన్నారులు శ్రీకృష్ణుడు వేషధారణలో అలరించారు. గ్రామోత్సవం, పొన్న వాహన సేవ, ఉట్టి కొట్టే కార్యక్రమం ఘనంగా.. శాస్త్రోక్తంగా.. ఉత్సాహంగా నిర్వహించారు.