Security to Witness in OMC: ఓబుళాపురం అక్రమ మైనింగ్ కేసు.. ప్రధాన సాక్షికి సెక్యూరిటీ
Security to Main Witness in OMC: ఓబుళాపురం అక్రమ మైనింగ్ కేసులో ప్రధాన సాక్షి అయిన టపాల్ శ్యాం ప్రసాద్ను సెక్యూరిటీతో కోర్టుకు తీసుకెళ్లడానికి కేంద్ర దర్యాప్తు సంస్థ అధికారులు రంగం సిద్ధం చేశారు. మొన్న జరిగిన కర్ణాటక ఎన్నికల్లో గాలి జనార్దన్ రెడ్డి గంగావతి నియోజకవర్గానికి ఎమ్మెల్యే అయిన తర్వాత ఎన్నికల అఫిడవిట్లో తప్పుడు సమాచారం ఇచ్చాడని కర్ణాటక ఎన్నికల కమిషన్కు, ముఖ్యమంత్రికి శ్యాం ప్రసాద్ లేఖ రాశారు. అలాగే రాయదుర్గం వైసీపీ ఎమ్మెల్యే కాపు రామచంద్రారెడ్డి తమ మైనింగ్లో అక్రమంగా మైనింగ్ వాడుకున్నారని ఫిర్యాదు చేశారు. రాయదుర్గం పోలీసులు.. ఎమ్మెల్యేపై కేసు నమోదు చేయడంలో నిర్లక్ష్యం వహించారన్నారు. ఈ నేపథ్యంలో శ్యాంప్రసాద్ రాయదుర్గం మెజిస్ట్రేట్ కోర్టుకు రాయదుర్గం పోలీసుల పైన ఫిర్యాదు చేశారు. వీటన్నిటిని దృష్టిలో పెట్టుకొని తనకు వారి నుంచి ప్రాణహాని ఉందని.. ఈ నేపథ్యంలో సీబీఐ కోర్టును సెక్యూరిటీ కోరినట్లు టపాల్ శ్యాంప్రసాద్ తెలిపారు. ఈ నెల 23వ తారీఖున నాంపల్లి సీబీఐ కోర్టులో తన వాదన వినిపించాల్సి ఉందన్నారు. అందుకోసమే సీబీఐ సెక్యూరిటీతో ఇవాళే తాను బయలుదేరుతున్నట్లు చెప్పారు. తనకు సెక్యూరిటీ కల్పించిన కోర్టుకు కృతజ్ఞతలు తెలిపారు.