Sarpanch Candidates Kidnapped: నామినేషన్​ వేసేందుకు వెళ్లిన అభ్యర్థుల కిడ్నాప్​.. పెనమల్లం సర్పంచ్​ ఉప ఎన్నికలో ట్విస్ట్​.. - తిరుపతి పార్లమెంట్ టీడీపీ అధ్యక్షుడు

Sarpanch Candidates Kidnapped In Penamallam Tirupati District:  తిరుపతి జిల్లా ఏర్పేడు మండలం పెనమల్లంలో సర్పంచ్‌ ఉప ఎన్నిక నామినేషన్ల ప్రక్రియ ఉద్రిక్తతకు దారితీసింది. సర్పంచ్​గా పోటీ చేసేందుకు నామినేషన్​ వెసేందుకు వెళ్లిన అభ్యర్థులను గుర్తు తెలియని వ్యక్తులు అపహరించడం స్థానిక రాజకీయాల్లో కలకలం రేపుతోంది. సర్పంచ్​ ఉప ఎన్నికలో పోటీలో నిలిచేందుకు వెంకటరత్నమ్మ, జ్ఞానమ్మలను టీడీపీ ఎంపిక చేసి బలపరిచింది. ఈ క్రమంలో వారు నామినేషన్​ వేసేందుకు వెళ్తున్న సమయంలో.. వారిపై గుర్తు తెలియని దుండగులు దాడికి తెగబడ్డారు. అంతటితో ఆగకుండా వెంకటరత్నమ్మ, జ్ఞానమ్మలను అపహరించుకుని వాహనంలో తీసుకుని వెళ్లారు. ఈ విషయం తెలుసుకున్న తిరుపతి పార్లమెంట్ టీడీపీ అధ్యక్షుడు నరసింహ యాదవ్ ఏర్పేడు మండల పరిషత్‌ కార్యాలయానికి చేరుకుని ఆందోళనకు దిగారు. అభ్యర్థుల ఆచూకీ కనుక్కోవాలని డిమాండ్​ చేశారు. నిబంధనలకు విరుద్ధంగా నామినేషన్ల ప్రక్రియ జరుగుతోందని ఆయన ఆరోపించారు. ఈ ప్రక్రియను రద్దు చేయాలని డిమాండ్‌ చేశారు. ఘటనపై ఎన్నికల కమిషన్‌కు ఫిర్యాదు చేస్తామని చెప్పారు.