పాడేరు ఘాట్​రోడ్డులో సబ్​ కాంట్రాక్టర్​ మృతిని ఛేదించిన పోలీసులు

Paderu Ghat Road Death Mystery :అల్లూరి సీతారామరాజు జిల్లా పాడేరు ఘాట్​ రోడ్​లో సబ్​ కాంట్రాక్టర్​ శ్రీధర్​ మృతికి గల కారణాలను పోలీసులు ఛేదించారు. డిసెంబర్​ 5న శ్రీధర్​ తన మిత్రుడు ఆదిబాబుతో కలిసి పాడేరులో పనులు ముగించుకుని తన స్వగ్రామానికి ద్విచక్రవాహనంలో తిరిగి వెళ్తుండగా ఆకస్మాత్తుగా పెద్ద శబ్దం వినిపించింది. ద్విచక్ర వాహనంపై వెళ్తున్న శ్రీధర్​ నుదుటిపై గాయం అయ్యి రహదారి పక్కన పడిపోయాడు. తన స్నేహితుడికి ఏం జరిగిందో అర్థం కాక ఆదిబాబు బోరున విలపించారు.

ఆదిబాబు స్థానికుల సహాయంతో శ్రీధర్​ను ఆసుపత్రికి తరలించారు. అతన్ని వైద్యులు పరీక్షించి అప్పటికే మృతి చెందినట్లు నిర్ధారించారు. శ్రీధర్​ మృతిపై పోలీసులు కేసు నమోదు చేసి విచారణ చేపట్టారు. శ్రీధర్​ పోస్ట్​మార్టం రిపోర్ట్​లో నుదుటిపై బుల్లెట్​ గాయమైనట్లు వైద్యులు గుర్తించారు. పోలీసులు ఆ దిశగా విచారణ చేపట్టారు. పాడేరు మండలం జోడూరి గ్రామానికి చెందిన సుబ్బారావు అనే వ్యక్తి నాటు తుపాకీతో కోతులను వేటాడుతుండగా గురి తప్పి అటుగా వెళ్తున్న శ్రీధర్​కు తగిలి మృతి చెందాడని ఎస్పీ ధీరజ్​ వెల్లడించారు.