Cheating with Gold Scheme: నమ్మకంగా ఉంటూ.. బంగారం, నగదు తీసుకుని - అంబేడ్కర్​ కోనసీమ జిల్లాలో బంగారం వ్యాపారి

Jeweller fraud in Katrenikona: ఓ బంగారం వ్యాపారి తన తండ్రికి ప్రజలలో ఉన్న నమ్మకాన్ని అదనుగా తీసుకుని మోసానికి తెరలేపాడు. ఒకటి కాదు రెండు కాదు దాదాపు 60 లక్షల రూపాయల వరకు తమను మోసం చేశాడని బాధితులు ఆరోపిస్తున్నారు. అంబేడ్కర్​ కోనసీమ జిల్లాలోని కాట్రేనికోన గ్రామంలో ప్రజలకు నమ్మకంగా ఉంటూ.. గత 30 సంవత్సరాలుగా ఓ వ్యాపారి రామలక్ష్మి గోల్డ్ షాపు పేరుతో నగల దుకాణాన్ని నిర్వహించుకుంటూ వచ్చాడు. అతనికి ఇద్దరు కుమారులున్నారు. వారు కూడా బంగారం వ్యాపారంలో తండ్రికి సహాయం చేస్తూ వచ్చారు. రెండు సంవత్సరాల క్రితం ఆ వ్యాపారి మరణించటంతో.. అతని కుమారుడు శ్రీధర్​ షాప్​ నిర్వహిస్తున్నాడు. ఈ క్రమంలో కొంత మంది శ్రీధర్​కు పాత బంగారం ఇచ్చి కొత్తగా అభరణాలు తయారు చేయమన్నట్లు బాధితులు తెలిపారు. అంతేకాకుండా ఇటివలే గోల్డ్​ స్కీం పేరుతో నెలవారి చెల్లింపులతో.. సరిపడ బంగారం తిరిగి ఇస్తానని శ్రీధర్​ నగదు కూడా వసూలు చేశాడని వివరించారు. బంగారం, నగదు తమ వద్ద నుంచి తీసుకున్నాడు తప్పా తిరిగి ఇవ్వటం లేదని ఆవేదన వ్యక్తం చేస్తున్నారు. దీనిపై ప్రశ్నిస్తే సమాధానం ఇవ్వటం లేదని నగదు చెల్లించిన వారంటున్నారు. అంతేకాకుండా ఇటీవలే ఓ బాధితునికి శ్రీధర్ తిరిగి​ ఇచ్చిన లక్ష 25వేల రూపాయల చెక్కు కూడా చెల్లుబాటు కాలేదని ఆరోపించారు.  కూలిపనులు చేసుకుని జీవనం సాగించే తాము.. దాచుకుని మరీ నగల వ్యాపారికి ఇచ్చామని వాపోయారు. న్యాయం చేయాలని బాధితులు పోలీసులను కోరారు.