డిసెంబర్​ 4న నేవీ డే - విశాఖ ఆర్కే బీచ్​లో విన్యాసాల రిహార్సల్స్‌

Indian Navy Day Celebration in Visakhapatnam : భారత నౌకాదళ దినోత్సవం కోసం తూర్పు నౌకాదళం సిద్ధమవుతోంది. డిసెంబర్‌ నాలుగో తేదీన జరిగే నేవీ డే కోసం విశాఖలోని ఆర్​కే బీచ్‌లో పూర్తి స్థాయి విన్యాసాలు చేయనుంది. విన్యాసాలు సన్నద్ధత కోసం మూడు రోజుల పాటు రిహార్సల్స్‌ నిర్వహిస్తోంది. యుద్ధ నౌకలు, హెలికాప్టర్లు, యుద్ధ విమానాలతో విన్యాసాలు చేశారు. తొలి విడతగా ఈ రోజు(మంగళవారం) నేవీ డే రిహార్సల్స్ నిర్వహించారు. ఈ మేరకు గగనతలంలో హెలికాప్టర్లు, యుద్ద విమానాలు సందడి చేశాయి.

నౌకాదళ దినోత్సవం సందర్భంగా నౌకాదళ విన్యాసాలకు విశాఖ సాగర తీరం పూర్తిగా సన్నద్ధమౌతుంది. ప్రతి సంవత్సరం లాగే ఈ ఏడాది కూడా భారీ స్థాయిలో నౌకాదళ విన్యాసాలు చేప‌ట్టనున్నారు. సముద్ర తీరాన ఆర్కే బీచ్​లో జరిగే ఈ ఉత్సవాలు అత్యంత ఆకర్షణీయంగా ఉంటాయి. ముఖ్యంగా విశాఖ తీరంలో ప్రతి సంవత్సరం ఈ ఉత్సవాల్ని చూసేందుకు ప్రజలు భారీ సంఖ్యలో వస్తారు. యుద్ధ నౌకలు చీకట్లో పసుపు రంగు లైట్లను వెలిగిస్తూ చూపరులనూ అట్టే కట్టి పడేస్తాయి. అలాగే మెరైన్ కమాండోల డ్రిల్, పారా జంపర్లు, స్కై డైవర్ల విన్యాసాలు చూసి తీరాల్సిందేనని ప్రజలు అంటూన్నారు.