Fire Accident: పలాసలో భారీ అగ్ని ప్రమాదం.. రూ. కోటిన్నర నష్టం..

Palasa Fire Accident: శ్రీకాకుళం జిల్లా పలాస-కాశీబుగ్గ మున్సిపాలిటీ పరిధిలో బుధవారం తెల్లవారుజామున భారీ అగ్ని ప్రమాదం సంభవించింది. భగవతి థియేటర్ రోడ్డులోని మూడు దుకాణాల్లో ఈ మంటలు భారీగా చెలరేగాయి. మొదట ఒక దుకాణంలో మంటలు చెలరేగి.. అనంతరం పక్కనే ఉన్న మరో రెండు దుకాణాలకు వ్యాపించినట్లు తెలుస్తోంది. రెండు దుకాణాల మధ్యలో కేవలం ప్లైవుడ్ ఉండటంతో బైక్ షోరూం నుంచి వచ్చిన మంటలు హార్డ్​ వేర్ దుకాణంలోకి వ్యాపించాయి. ఈ అగ్ని ప్రమాదంలో ఎలక్ట్రిక్‌ బైక్​ దుకాణం, హార్డ్​వేర్​ షాప్, మద్యం దుకాణాలు దగ్ధమయ్యాయి. ఈ ప్రమాదంలో దాదాపు 100 పాత, కొత్త బైక్​లు దగ్ధమైనట్లు యజమానులు తెలిపారు. వీటితో పాటు మద్యం దుకాణం, హార్డ్‌వేర్ షాప్​లోనూ సామగ్రి పూర్తిగా కాలిపోయింది. దీంతో ఈ అగ్ని ప్రమాదం కారణంగా భారీగా నష్టం వాటిల్లింది. దాదాపు కోటిన్నర రూపాయల నష్టం జరిగి ఉంటుందని.. అంచనా వేస్తున్నారు. మంటలు ఎలా చెలరేగాయి అనే విషయం ఇంకా తెలియరాలేదు. అయితే తెల్లవారుజామున ఆ ప్రాంతంలో పొగలు రావటాన్ని గమనించిన స్థానికులు అగ్నిమాపక సిబ్బందికి సమాచారాన్ని అందించారు. వెంటనే ఘటనా స్థలికి అగ్నిమాపక సిబ్బంది చేరుకుని ఈ రోజు ఉదయం 5 గంటల నుంచి 8 గంటల వరకు మంటలను అదుపు చేసేందుకు ప్రయత్నించారు.