Employee facial recognition system attendance : ఉద్యోగులంతా 'ఎఫ్ఆర్ఎస్ హాజరు' పాటించాలి.. సాధారణ పరిపాలన శాఖ ఆగ్రహం - ఉద్యోగుల హాజరు విధానం

Employee facial recognition system attendance : ఫేషియల్ రికగ్నేషన్ విధానం ద్వారా పూర్తి స్థాయిలో ఉద్యోగుల హాజరు నమోదు కాకపోవడం పై సాధారణ పరిపాలన శాఖ ఆగ్రహం వ్యక్తం చేసింది. ఈ మేరకు తక్షణ చర్యలు తీసుకోవాలని ఆదేశిస్తూ మెమో జారీ చేసింది. ఫేస్ రికగ్నేషన్ యాప్​లో 100 శాతం ఉద్యోగులు ఇంకా నమోదు చేసుకోలేదని జీఏడీ పేర్కొంది. ఇప్పటికీ కేవలం 45 - 50 శాతం మంది ఉద్యోగులు మాత్రమే ఎఫ్​ఆర్​ఎస్ ద్వారా హాజరు వేస్తున్నారని గుర్తించింది. చాలా మంది ఉద్యోగులు ఉదయం ఫేస్ రికగ్నిషన్ యాప్ ద్వారా చెక్ ఇన్ అయినా యాప్ ద్వారా చెక్ అవుట్ కాకపోవడంపై జీఏడీ అభ్యంతరం తెలిపింది.

ఉద్యోగుల సెలవులను ఎఫ్​ఆర్​ఎస్ విధానం ద్వారా నమోదు చేయాల్సి ఉన్నా ఉద్యోగులు దాన్ని పాటించడం లేదని స్పష్టం చేసింది. ఇన్​ఛార్జ్​లు, పర్యవేక్షణా అధికారుల లోపం వల్లే ఫేస్ రికగ్నిషన్ విధానం అమలు సరిగా లేదని సాధారణ పరిపాలన శాఖ మెమోలో పేర్కొంది. ఎఫ్​ఆర్​ఎస్ సరిగ్గా అమలయ్యేలా ఇన్​చార్జులు జాగ్రత్తలు తీసుకోవాలని ఆదేశించింది. ఈ మేరకు అన్ని శాఖల సెక్రటరీలు.. హెచ్​ఓడీలు, జిల్లా కలెక్టర్లకు జీఏడీ మెమో జారీ చేసింది.