Chintakayala Ayyanna Patrudu: "వైసీపీ ప్రభుత్వం దేవుళ్లనీ దోచుకుంటోంది.. తిరుపతి హుండీ డబ్బుల్నీ వదలట్లేదు"

Chintakayala Ayyanna Patrudu: వైసీపీ ప్రభుత్వం అధికారంలోకి వచ్చిన నాటి నుంచి తిరుమల తిరుపతి దేవస్థానానికి చెందిన  నిధులను స్వాహా చేస్తున్నారని మాజీ మంత్రి చింతకాయల అయ్యన్నపాత్రుడు ఆరోపించారు. ఈ మేరకు అనకాపల్లి జిల్లా నర్సీపట్నంలోని మీడియా సమావేశం నిర్వహించారు. జగన్మోహన్ రెడ్డి అధికారంలోకి వచ్చిననాటి నుంచి  శ్రీవాణి ట్రస్ట్ పేరుత నిధులను మాయం చేస్తున్నారని ఆరోపించారు. రాష్ట్రంలో దేవాదాయ శాఖకు చెందిన వేలాది ఎకరాలు అన్యాక్రాంతమవుతున్నాయని ఆరోపించారు. ఈ విషయాన్ని దేవాదాయ శాఖ మంత్రే అంగీకరించారని అయ్యన్న పేర్కొన్నారు. ప్రపంచ వ్యాప్తంగా తిరుమల అంటే భక్తి నమ్మకం ఉంటుందని... స్వామి వారిపై భక్తితో ఇచ్చిన నిధులను సైతం దోచుకుంటున్నారని ఆరోపించారు. హుండీలో  వేసిన డబ్బులను సైతం వదలడం లేదని విమర్శించారు. ఈ అంశంపై ఎవరైనా మాట్లాడితే కేసులు పెడతామని బెదిరిస్తున్నారని అయ్యన్న ఆగ్రహం వ్యక్తం చేశారు. ఎందుకు దోపిడి చేయవలసిన పరిస్థితి వచ్చిందో చెప్పాలని డిమాండ్ చేశారు. శ్రీవాణి ట్రస్ట్ పేరు పెట్టి టిక్కెట్ల పేరుతో  మోసం  చేస్తున్నారని ఆరోపించారు. లడ్డూ సైజ్​ను సైతం తగ్గించారని, ధరలు  సైతం పెంచారని అయ్యన్న వెల్లడించారు. ఇప్పటికైనా దోపిడీని ఆపాలని సూచించారు. హిందూ దేవాలయాల్లో హిందువులను మాత్రమే ట్రస్ట్ మెంబర్లుగా పెట్టాలని అయ్యన్న డిమాండ్ చేశారు.