Chandrababu Protest Initiation in Rajamahendravaram Jail: మహాత్ముడి బాటలో..! జైలులో రేపు చంద్రబాబు దీక్ష.. భువనేశ్వరి సైతం

Chandrababu Protest Initiation in Rajamahendravaram Jail:నైపుణ్యాభివృద్ధి కేసులో తనను అక్రమంగా అరెస్టు చేశారని నిరసిస్తూ.. టీడీపీ అధినేత చంద్రబాబు రాజ మహేంద్రవరం జైలులో గాంధీ జయంతి రోజు నిరసన దీక్ష చేపట్టనున్నారు. అదే రోజు చంద్రబాబు సతీమణి భువనేశ్వరి రాజమహేంద్రవరంలో నిరసన దీక్ష చేయనున్నారని.. నందమూరి బాలకృష్ణ ప్రకటించారు. శనివారం నంద్యాలలో పీఏసీ సమావేశం జరుగుతున్న సమయంలోనే తన చెల్లెలు భువనేశ్వరి ఫోన్ చేసి దీక్ష చేయనున్నట్లు తెలిపారని వెల్లడించారు. 

పార్టీ అధినేత నిరసన నేపథ్యంలో రాష్ట్రంలోని అన్ని నియోజకవర్గాల్లో పార్టీ నాయకులు, కార్యకర్తలు కూడా దీక్షలు చేస్తారని పార్టీ రాష్ట్ర అధ్యక్షుడు అచ్చెన్నాయుడు తెలిపారు. పార్టీ ఇచ్చిన పిలుపునకు స్పందించి రాష్ట్రవ్యాప్తంగా పెద్ద సంఖ్యలో ప్రజలు 'మోత మోగిద్దాం' కార్యక్రమంలో పాల్గొన్నందుకు కృతజ్ఞతలు తెలిపారు. టీడీపీ ఇచ్చిన పిలుపు మేరకు చంద్రబాబుకు మద్దతుగా రాష్ట్రంలోని ప్రజలు, టీడీపీ అభిమానులు, శ్రేణులు, కార్యకర్తలు.. 'మోత మోగిద్దాం' కార్యక్రమంలో పాల్గొన్నారు. ఈలలు, హారన్​లు, గిన్నెలు ఇలా ఏది అందుబాటులో ఉంటే దానితో శబ్దం చేసి.. తమ మద్దతు ప్రకటించారు.