బనగానపల్లె బస్టాండ్​లో ప్లాట్​ ఫాం పైకి దూసుకువచ్చిన బస్సు - మహిళకు గాయాలు - ఆర్టీసీ బస్సు ప్రమాదం

Banaganapalle RTC Bus Incident: నంద్యాల జిల్లా బనగానపల్లె ఆర్టీసీ బస్టాండ్​లో ప్లాట్​ ఫాం పైకి బస్సు దూసుకొచ్చిన ఘటన ప్రయాణికులను ఆందోళనకు గురి చేసింది. బస్సు ఒక్కసారిగా దూసుకురావడంతో అక్కడ ఉన్న వారికి ఏం జరుగుతుందో అర్థం కాని పరిస్థితి నెలకొంది.  ఈ ఘటనలో ఓ మహిళ ప్రయాణికురాలికి స్వల్ప గాయాలయ్యాయి. పెద్దగా ప్రమాదమేమీ సంభవించకపోవడంతో అక్కడున్న ప్రయాణికులు ఊపిరి పీల్చుకున్నారు.

ప్రయాణికులు తెలిపిన వివరాల ప్రకారం నంద్యాల జిల్లా బనగానపల్లె ఆర్టీసీ బస్టాండులో బస్సు ఒక్కసారిగా ప్లాట్​ ఫాం పైకి దూసుకు వచ్చింది. బస్సు బ్రేకులు ఫెయిలై ప్లాట్​ ఫాం పైకి దూసుకు రావడంతో అక్కడ ఉన్న ప్రయాణికులు ఆందోళనకు గురయ్యారు.  బనగానపల్లె నుంచి నంద్యాలకు వెళ్తున్న బస్సు ఐదో నెంబర్ ప్లాట్​ ఫాం వద్దకు వస్తున్న క్రమంలో ఈ ఘటన జరిగింది. ఈ క్రమంలో అక్కడున్న ఓ మహిళకు స్వల్ఫ గాయాలయ్యాయి. అక్కడున్న ఆమె తండ్రి బస్సును గమనించి పక్కకు లాగడంతో స్వల్ఫ గాయాలతో బయటపడిందని ప్రత్యక్ష సాక్షులు వివరించారు. వేగంగా దూసుకొచ్చిన బస్సు ఎదురుగా ఉన్న దిమ్మెను బలంగా ఢీకొట్టింది. ప్లాట్​ ఫాం ఎత్తు తక్కువగా ఉండటంతోనే బస్సు దూసుకొచ్చిందని, ఎత్తుగా ఉంటే అక్కడే ఆగేదాని ప్రయాణికులు అంటున్నారు. ఇప్పటికైనా అధికారులు స్పందించి ప్లాట్​ ఫాం ఎత్తు పెంచాలని కోరుతున్నారు.