Anganwadi Milk in Sri Satyasai Disrict : 'జగనన్న సంపూర్ణ పోషణ' పాల ప్యాకెట్​ తీసుకున్నారా..? అయితే ఒకసారి చెక్​ చేసుకోండి.. - ఆంధ్రప్రదేశ్​ తాజా వార్తలు

 Anganwadi Milk in Sri Satyasai Disrict : జగనన్న సంపూర్ణ పోషణ కింద గర్భిణులకు, బాలింతలకు  అంగన్​వాడీ కేంద్రాలలో ఇచ్చే పాలపాకెట్​లలో పురుగులు వచ్చాయి. పేదలకు ఇచ్చే సరుకులపై  ముఖ్యమంత్రి జగన్ ఫొటో ముద్రించే విషయంలో ఉన్న శ్రద్ధ నాణ్యతపై లేదని ప్రజలు వాపోతున్నారు. అంగన్​వాడీ కేంద్రాలలో పంపిణీ చేసే పదార్ధాలలో ఒకచోట పాములు వస్తే మరోచోట ఈగలు వస్తున్నాయి. ఇప్పుడేమో శ్రీ సత్య సాయి జిల్లాలో ఏకంగా పాల ప్యాకెట్లలో తెల్లటి పురుగులు వచ్చాయి.

Worms in Sampurna Poshana Milk : సత్యసాయి జిల్లా లేపాక్షి మండలం పులమతిసడ్లపల్లి అంగన్​వాడీ కేంద్రంలో గర్భిణికి రెండు రోజుల క్రితం పాల ప్యాకెట్లు పంపిణీ చేశారు. ఆమె ఆ పాలను వేడి చేసేందుకు  గిన్నెలో పోస్తుండగా తెల్లటి పురుగులు కనిపించాయి. అప్రమత్తమైన ఆమె కుటుంబ సభ్యులకు వాటిని చూపించింది. మిగిలిన ప్యాకెట్లను గిన్నెలో పోసి చూడగా వాటిలోనూ పురుగులు రావడంతో గ్రామస్తులు విస్తుపోయారు. ఈ విషయం గ్రామమంతా తెలిసి సంపూర్ణ పథకం పొందుతున్న అందరు ప్యాకెట్లు విప్పి చూడగా తెల్లటి పురుగులు కనిపించడంతో ఆందోళన వ్యక్తం చేశారు. మనుషుల ప్రాణాలు తీసేందుకు ఇలాంటి పాలను సరఫరా చేస్తున్నారా? అంటూ గ్రామస్తులు ఆగ్రహం వ్యక్తం చేశారు.