ఎస్టేట్‌ అధికారిగా పనిచేసిన ధర్మారెడ్డి తితిదే ఈఓ పోస్టుకు ఎలా అర్హుడు? : ఆనం - Scan of YCP leaders in Tirumala Devasthanam

Anam Venkataramana Reddy Allegations on TTD EO Dharma Reddy:తిరుమల తిరుపతి దేవస్థానంలో ధర్మారెడ్డి ఫేక్ ఆఫీసరని.. ఈఓగా పనిచేయడానికి అతనికి అర్హత లేదని టీడీపీ రాష్ట్ర అధికార ప్రతినిధి ఆనం వెంకటరమణారెడ్డి విమర్శించారు. ధర్మారెడ్డి ఛాలెంజ్​కు తాను సిద్దమని, చర్చ ఎక్కడ పెట్టినా తాను ఒంటరిగానే వస్తానని ప్రకటించారు. ఈ విషయం తెలిసి కూడా రాష్ట్ర ప్రభుత్వం ఆయన్ను పూర్తిస్థాయి అదనపు విధులతో ఈఓగా నియమించిందన్నారు. దిల్లీలో ఎస్టేట్‌ అధికారిగా పనిచేసిన ధర్మారెడ్డి... సీనియర్‌ ఐఏఎస్​లు ఉండాల్సిన తితిదే ఈఓ పోస్టుకు ఎలా అర్హుడో చెప్పాలని నిలదీశారు.

రాజశేఖర్ రెడ్ది ముఖ్యమంత్రి అయిన తరువాత ధర్మారెడ్డిని ఓఎస్డీగా నియమించారని.. జగన్ సీఎం అయిన అనంతరం తిరుమలలో కొత్త పోస్ట్ సృష్టించి అడిషనల్ ఎగ్జిక్యూటివ్ ఆఫీసర్​గా నియమించారని తెలిపారు. ఎస్టేట్ ఆఫీసర్ అయిన ధర్మారెడ్డి చీఫ్ సెక్రటరీ అని చెప్పుకోవడం సిగ్గుచేటని వెంకట రమణారెడ్డి విమర్శించారు. నాలుగు వేల కోట్ల బడ్జెట్ ఉన్న తిరుమలకు చంద్రబాబు ఇండియన్ ఆడిట్ అకౌంట్స్ ఆఫీసర్​ను అధికారిగా నియమిస్తే.. జగన్ మాత్రం కామర్స్ చదివిన వ్యక్తిని నియమించడం దారుణమన్నారు. ఐఆర్ఎస్ అధికారి ఉంటే దేవస్థానం సొమ్ము పక్క దారి పట్టించడం వీలుకాదనే చార్టెడ్ అకౌంటెంట్​ను నియమించారని దుయ్యబట్టారు. తిరుమలలో జరుగుతున్న ఆర్ధిక లావాదేవీలపై విచారణ జరగాల్సిన అవసరం ఉందని వెంకటరమణారెడ్డి పేర్కొన్నారు.