'వైఎస్సార్సీపీ పాలనలో అటకెక్కిన అభివృద్ధి - జగన్​మోహన్​రెడ్డి కాలం చెల్లిన ముఖ్యమంత్రి' - ఏపీ లేటెస్ట్ న్యూస్

All Party Meeting in Kadapa: ఐదేళ్ల పాలనలో వైఎస్సార్సీపీ ప్రభుత్వం పూర్తిగా విఫలమైందని అఖిలపక్ష పార్టీ నాయకులు ఆరోపించారు. 'ఐదేళ్ల వైఎస్సార్సీపీ పాలనలో అటకెక్కిన అభివృద్ధి' అనే అంశంపై కడప ప్రెస్ క్లబ్​లో సీపీఐ ఆధ్వర్యంలో రౌండ్ టేబుల్ సమావేశాన్ని నిర్వహించారు. పలు అఖిలపక్ష పార్టీ నాయకులు ఈ సమావేశానికి హాజరయ్యారు. అభివృద్ధి అంటే పాత వాటికి రంగులు వేసి ప్రారంభోత్సవాలు చేయడంకాదని ఎద్దేవా చేశారు. ఉపాధి కల్పన, ప్రాజెక్టుల నిర్మాణం, విద్య వైద్య రంగాలలో అభివృద్ధి సాధించినప్పుడు రాష్ట్రం అభివృద్ధి చెందినట్లని పేర్కొన్నారు. 

Opposition Parties Leaders Fire on CM Jagan: జగన్మోహన్ రెడ్డి పాలనలో ఎక్కడ వేసిన గొంగడి అక్కడే ఉందని అఖిలపక్ష నేతలు పేర్కొన్నారు. కడపలో సూపర్ స్పెషాలిటీ ఆసుపత్రి నిర్మించినా ఇప్పటివరకు వైద్యుల నియామకం జరగలేదని తెలిపారు. ఆధునీకరణ పేరిట రూ.2,150 కోట్లతో కడప నగర అభివృద్ధిని చేపట్టారని అయితే కేవలం ప్రధాన రోడ్లు తప్ప శివారు ప్రాంతాలకు వెళ్తే అక్కడ ఉన్న సమస్యలు మరి ఎక్కడా ఉండవని పేర్కొన్నారు. జగన్మోహన్ రెడ్డి కాలం చెల్లిన ముఖ్యమంత్రి అని, ఆయనను గద్దె దింపేందుకు రాష్ట్ర ప్రజలంతా ఎదురుచూస్తున్నారని అన్నారు. వైఎస్సార్సీపీ హయాంలో జగన్మోహన్ రెడ్డి అనుచరులు, ఆయన మంత్రుల ప్రజలు అభివృద్ధి చెందలేదని విమర్శించారు.