రాష్ట్రంలో విశ్వవిద్యాలయాలు రాజకీయాలకు నిలయంగా మారాయి: ఏబీవీపీ - విజయవాడ వార్తలు

All India Student Council Press conference : రాష్ట్రంలో విశ్వవిద్యాలయాలు అనేవి రాజకీయాలకు నిలయాలుగా మారిపోయాయని అఖిల భారత విద్యార్థి పరిషత్ (ABVP) రాష్ట్ర కార్యదర్శి యాచేంద్ర ఆరోపించారు. విజయవాడలో నిర్వహించిన విలేకరుల సమావేశంలో ఈ వ్యాఖ్యలు చేశారు. దిల్లీలో జరగపోయే అఖిల భారత విద్యార్థి పరిషత్.. 69వ జాతీయ సభలకు సంబంధించిన గోడపత్రికను ఆవిష్కరించారు. రాజకీయాలకు ఆతీతంగా ఉండవలసిన విశ్యవిద్యాలయాల్లో రాజకీయ నాయకుల విగ్రహాలను ఏర్పాటు చేస్తున్నారని ఆవేదన వ్యక్తం చేశారు. 

శ్రీ కృష్ణదేవరాయ విశ్వవిద్యాలయం వీసీ రామకృష్ణా రెడ్డి తన పదవి కాలపరిమితి పొడిగించుకోవడానికి.. మాజీ ముఖ్యమంత్రి వైఎస్ రాజశేఖర్ రెడ్డి విగ్రహం ఏర్పాటు చేసి జగన్ మెప్పు పొందాలనుకున్నారని ఆరోపించారు. దానిని అడ్డుకున్న విద్యార్థుల సంఘాలపై అక్రమంగా కేసులు పెట్టారని ఈ సందర్భంగా తెలియజేశారు. గత ఎన్నికల్లో వైసీపీ ప్రభుత్వం.. నిరుద్యోగులకు ప్రతి సంవత్సరం జాబ్ క్యాలెండర్ ప్రకటిస్తామని చెప్పి మోసం చేసిందని పేర్కొన్నారు. యువతకు తమ ప్రభుత్వం హయాంలో ఏం చేశారో చెప్పాలని డిమాండ్ చేశారు.