సీఎం జగన్ కారును ఢీకొన్న కాన్వాయ్​లోని మరో వాహనం - తప్పిన ప్రమాదం - కడప జిల్లాలో సీఎం జగన్ కారుకు ప్రమాదం

Accident to CM Jagan Car in Idupulapaya: ముఖ్యమంత్రి జగన్మోహన్ రెడ్డి ప్రయాణిస్తున్న వాహనానికి స్వల్ప ప్రమాదం సంభవించింది. వైఎస్సార్ జిల్లా ఇడుపులపాయ ఎస్టేట్ సమీపంలో సీఎం వాహనాన్ని కాన్వాయ్​లోని మరో వాహనం వెనక నుంచి ఢీకొట్టడంతో ప్రమాదం జరిగింది. ఉదయం నుంచి ఇడుపులపాయ నెమళ్ల పార్కులో వేముల మండలం వైసీపీ నాయకులతో సమీక్ష నిర్వహించిన అనంతరం.. సీఎం జగన్ ఇడుపులపాయలోని ఎస్టేట్​కి బయలుదేరారు. ఎస్టేట్ సమీపంలోకి సీఎం కాన్వాయ్ రాగానే.. జగన్ ప్రయాణిస్తున్న వాహనం ముందున్న మరో వాహనం ఒక్కసారిగా వేగం తగ్గించడంతో.. వెనక ఉన్న మరో వాహనం సీఎం వాహనాన్ని ఢీకొట్టింది. 

ఈ ప్రమాదంలో కాన్వాయ్​లోని రెండు వాహనాలకు ఇండికేటర్లు దెబ్బతిన్నాయి. వెంటనే అప్రమత్తమైన భద్రతా సిబ్బంది సీఎం జగన్​ను మరో వాహనంలో ఇడుపులపాయ ఎస్టేట్​కు తీసుకెళ్లారు. సీఎంకు ఎలాంటి ప్రమాదం జరగకపోవడంతో అందరూ ఊపిరి పీల్చుకున్నారు. అనంతరం సీఎం జగన్​ ఇడుపులపాయ ఎస్టేట్ సమీపంలో నుంచి హెలికాప్టర్​లో బయలుదేరి కడప విమానాశ్రయం చేరుకున్నారు. రెండు రోజుల పర్యటన ముగించుకుని కడప విమానాశ్రయం నుంచి ప్రత్యేక విమానంలో సీఎం జగన్ గన్నవరం బయలుదేరి వెళ్లారు. సీఎం వాహనానికి ప్రమాదం ఎలా జరిగిందనే దానిపై పోలీసులు ఆరా తీస్తున్నారు.