కడప యోగివేమన విశ్వవిద్యాలయం శనివారం విడుదల చేసిన డిగ్రీ ఫలితాల్లో జమ్మలమడుగు పట్టణానికి చెందిన శ్రావణి సత్తా చాటింది. బీఎస్సీ కంప్యూటర్‌ సైన్స్‌ విభాగంలో పదికి 10 గ్రేడింగ్‌ పాయింట్లతో విశ్వవిద్యాలయం పరిధిలోనే ప్రథమ స్థానంలో నిలిచింది.
పట్టణంలోని తాడిపత్రి రోడ్డు ప్రాంతానికి చెందిన వెంకటేష్‌, సుగునమ్మ దంపతులది నిరుపేద కుటుంబం. రెక్కాడితే కాని డొక్కాడని జీవనం. వెంకటేష్‌ కూలి పనులు చేస్తుండగా.. సుగునమ్మ తోపుడుబండిపై పండ్లు విక్రయిస్తూ కుటుంబాన్ని నెట్టుకొస్తున్నారు. వీరికి ఇద్దరు ఆడపిల్లలు. మొదటి అమ్మాయి ఎం.లక్ష్మి ఎమ్మెస్సీ చదివి నెల్లూరులోని ఓ ప్రైవేటు కళాశాలలో అధ్యాపకురాలిగా పనిచేస్తున్నారు. రెండో అమ్మాయి మేకల శ్రావణి పదో తరగతి వరకు జమ్మలమడుగు ప్రభుత్వ బాలికల ఉన్నత పాఠశాలలో చదువుకుంది. స్థానిక ప్రైవేటు డిగ్రీ కళాశాలలో బీఎస్సీ కంప్యూటర్‌ సైన్స్‌ విద్యనభ్యసించింది. అక్టోబరు 31న యోవేవి విడుదల చేసిన డిగ్రీ ఆరో సెమిస్టర్‌ ఫలితాల్లో శ్రావణి 10కి 10 గ్రేడింగ్‌ పాయింట్లతో మొదటి స్థానంలో నిలిచింది.