కడప జిల్లా బద్వేలు ఉపఎన్నిక(election campaign at badvel)ను ప్రధాన పార్టీలు ప్రతిష్టాత్మకంగా తీసుకున్నాయి. ఆయా పార్టీల కీలక నేతలు అక్కడే మకాం వేసి ఓట్ల వేటలో పడ్డారు. వైకాపా అభ్యర్థి డాక్టర్ సుధ గెలుపు కోసం.. మంత్రులు, ఎమ్మెల్యేలు విస్తృత ప్రచారం(bjp and ycp campaign at badvel) చేస్తున్నారు. గత ఎన్నికల్లో వచ్చిన మెజారిటీ కంటే ఎక్కువ ఓట్లు సాధిస్తామని చెబుతున్నారు. భాజపాకు స్థానికంగా నాయకులు, కార్యకర్తలు లేకపోవడం వల్ల తెలుగుదేశం నేతలను తెచ్చుకుంటున్నారని వైకాపా ఎమ్మెల్యే కాకాని గోవర్ధన్‌రెడ్డి ఎద్దేవా చేశారు.
రాష్ట్రంలో అరాచక పాలన: సోము వీర్రాజు
రాష్ట్రంలో అరాచక పాలన సాగుతోందని భాజపా రాష్ట్ర అధ్యక్షుడు సోము వీర్రాజు మండిపడ్డారు. బద్వేలుకు కేంద్రం ఏం చేసింది, రాష్ట్ర ప్రభుత్వం ఏం చేస్తోందనే దానిపై కరపత్రాలు ముద్రించి ప్రచారం చేస్తున్నామని మాజీమంత్రి ఆదినారాయణరెడ్డి, జాతీయ కార్యదర్శి సత్యకుమార్ వివరించారు. మార్పు కోసం ప్రజలు ఒక్క అవకాశం ఇవ్వాలని మిత్రపక్షం జనసేనతో కలిసి ఓటర్లను అభ్యర్థించారు.