కడప జిల్లా ఓబులవారిపల్లె మండలం మంగంపేట ఏపీఎండీసీలో గునిపాటి రవిశంకర్ పని చేసేవాడు. అతడిని ఉన్నతాధికారులు విధుల నుంచి ఉన్నఫళంగా తప్పించారు. ఈ వ్యవహారంపై.. కార్మిక సంఘం నాయకులు అభ్యంతరం వ్యక్తం చేశారు. 'త్రివేణి కంపెనీకి చెందిన మట్టి తన పొలంలో వేయగా రవిశంకర్ అభ్యంతరం వ్యక్తం చేశారు. ఈ మాత్రం దానికే ఎటువంటి నోటీసులు, విచారణ లేకుండానే ఈ నెల 16న రవిశంకర్ను సస్పెండ్ చేశారు' అని కార్మిక సంఘం నాయకులు తెలిపారు.
పునరావాస ప్రజలను ఏపీఎండీసీ యాజమాన్యం మోసం చేస్తుందని గ్రామస్థులు ఆరోపించారు. ఈ మధ్యకాలంలో ఎలాంటి నోటీసులు లేకుండా ఎనిమిది మంది ఉద్యోగులను తొలగించడం దుర్మార్గమైన చర్యగా పేర్కొన్నారు. రవిశంకర్ను వెంటనే విధుల్లోకి తీసుకోవాలని కోరుతూ... అధికారులకు గ్రామస్థులు, కార్మిక సంఘం నాయకులు వినతిపత్రం అందజేశారు.