Sunil Yadav Bail Petition: వైఎస్ వివేకా హత్య కేసు నిందితుడు సునీల్ యాదవ్ బెయిల్ కోసం తెలంగాణ హైకోర్టును ఆశ్రయించారు. పులివెందులకు చెందిన సునీల్ యాదవ్ను 2021 ఆగస్టులో సీబీఐ అరెస్టు చేసింది. కేసులో రెండో నిందితుడిగా ఉన్న సునీల్ యాదవ్‌పై 2021 అక్టోబరులో సీబీఐ ఛార్జ్‌షీట్‌ దాఖలు చేసింది. గతంలో సునీల్ యాదవ్కు కడప జిల్లా కోర్టు, ఏపీ హైకోర్టు బెయిల్ తిరస్కరించింది. వివేకా హత్యకేసు హైదరాబాద్‌కు బదిలీ కావడంతో తాజాగా తెలంగాణ హైకోర్టులో సునీల్ బెయిల్ పిటిషన్ వేశాడు. సునీల్ యాదవ్ ప్రస్తుతం చంచల్ గూడ జైళ్లో ఉన్నారు. సునీల్ యాదవ్ బెయిల్ పిటిషన్‌పై ఈనెల 16న హైకోర్టులో విచారణ జరగనుంది.
మాజీ మంత్రి వైఎస్ వివేకానందరెడ్డి హత్య కేసు విచారణలో భాగంగా నిందితులను కడప నుంచి హైదరాబాద్‌ తీసుకొచ్చిన విషయం తెలిసిందే.. నిందితులు సునీల్ యాదవ్, దేవిరెడ్డి శివశంకర్‌రెడ్డి, ఎర్ర గంగిరెడ్డి, దస్తగిరితో పాటు మరో నిందితుడు ఉమాశంకర్‌రెడ్డిని సీబీఐ కోర్టులో హాజరుపరచగా.. ఉమాశంకర్‌రెడ్డి వాహనం ట్రాఫిక్‌లో ఆగిపోయినందున మిగిలిన నిందితులను తొలుత కోర్టులో హాజరుపరచలేకపోయారు.