కడపలో ఖర్జూరం సాగు... అధిక దిగుబడితో లాభాల పంట

ఎడారి పంట అయిన ఖర్జూర సాగు కేవలం సౌదీ అరేబియా తదితర ప్రాంతాల్లోనే పండుతుందని ఒక అపోహ ప్రజల్లో ఉండేది. మన ప్రాంతంలో ఆ మొక్కలు నాటినా పంట రాదని అనుమానం వ్యక్తం చేసేవారు. ఇప్పుడిప్పుడే కడప జిల్లాలో ఖర్జూరాన్ని సాగు చేస్తున్నారు. పంటపై అవగాహనతో సహా మెళకువలు, జాగ్రత్తలు పాటిస్తే మంచి దిగుబడితో పాటు అధిక లాభాలు పొందవచ్చని యువ రైతులు చెబుతున్నారు.

అతను ఓ సాఫ్ట్​వేర్ ఇంజనీరు. పేరు కిరణ్ కుమార్ రెడ్డి. కడప జిల్లా పెద్దముడియం మండలం ఉలవపల్లి గ్రామం స్వస్థలం. సుమారు 10 ఏళ్లుగా సాఫ్ట్​వేర్ ఇంజనీర్​గా పని చేస్తున్నారు. వ్యవసాయం అంటే చాలా ఇష్టం. అందునా కొత్త రకాల పంటలు పండించడం అంటే మరింత ఆసక్తి చూపేవారు. అతని సీనియర్ మేనేజర్ సూచనమేరకు ఖర్జూరం సాగు చేయాలన్న ఆలోచన వచ్చినట్లు ఆయన చెప్పారు. ఆ పంట గురించి పూర్తి వివరాలు తెలుసుకుని, 6 నెలల పరిశోధన అనంతరం.. ఉలవపల్లిలో నాలుగేళ్ల క్రితం ఆ ఆలోచనను ఆచరణలోనికి తీసుకొచ్చినట్లు వెల్లడించారు.

ఆరు ఎకరాల్లో 10 మగ మొక్కలు సహా మొత్తం 440 నాటారు. కొత్తలో చుట్టుపక్కల రైతుల నుంచి పలు విమర్శలు ఎదుర్కొన్నట్లు పేర్కొన్నారు. ఈ మొక్కలు మన ప్రాంతానికి సరిపోవని, దిగుబడి రాదని, నష్టం వస్తుందని అనేక మంది హెచ్చరించినా పట్టించుకోలేదని గుర్తుచేసుకున్నారు. ఉద్యానశాఖ అధికారుల సలహా ప్రకారం జాగ్రత్తలు తీసుకుంటూ ముందుకు సాగడంతో.. ఇప్పుడు ఫలితాలు అనుభవిస్తున్నట్లు కిరణ్ కుమార్​ రెడ్డి చెబుతున్నారు. ప్రభుత్వం మార్కెటింగ్ సౌకర్యం కల్పిస్తే ఖర్జూరం సాగువైపు మరికొంత మంది రైతులు మొగ్గుచూపుతారని భావిస్తున్నానన్నారు.

ఇదీ చదవండి:జేఈఈ మెయిన్స్​ మే సెషన్​ వాయిదా

జిల్లాలోని పెద్దముడియం మండలం ఉలవపల్లిలోనే మొట్టమొదటిసారిగా ఖర్జూరం సాగు చేయడం విశేషం. ఇతర ప్రాంతాలకు చెందిన రైతులు సైతం ఆసక్తి చూపడంతో.. పంట క్రమేణా విస్తరిస్తోంది. ప్రస్తుతం 96.50 ఎకరాల్లో ఈ పంట సాగులో ఉంది. గాలివీడులో 18 ఎకరాలు, సింహాద్రిపురంలో 15, పులివెందులలో 13 , కోడూరులో 10 , రామాపురంలో 7, పెద్దముడియంలో 6.5, రాజంపేట సంబేపల్లిలో ఐదు, ఎర్రగుంట్లలో 4.5, చక్రాయపేటలో 4, లింగాల వల్లూరులో 2.5, వేములలో 2, వేంపల్లిలో 1.5 చొప్పున పండిస్తున్నారు. ఆధునిక పంటలు పండిచేందుకు ఉద్యానశాఖ అధికారుల నుంచి ఎప్పుడూ ప్రోత్సహం ఉంటుంది. - జయభారత్ రెడ్డి , ఉద్యాన శాఖ అధికారి, పొద్దుటూరు.

ఖర్జూరం సాగు ఖర్చుతో కూడుకున్నదే అయినా తర్వాత మంచి లాభాలు వస్తాయని అధికారులు చెబుతున్నారు. ఉద్యాన శాఖ అధికారుల సలహాలు తీసుకుంటూ.. కొన్ని మెళకువలు పాటిస్తే ఎలాంటి నష్టం ఉండదని అంటున్నారు.

ఇదీ చదవండి: