సిమెంట్ దొంగలించాడని... చెట్టుకు కట్టి కొట్టేశారు!

అన్నా అమ్మతోడు అన్నా.. నాకు తెలియదన్నా.. అని వేడుకుంటున్నా వారు కనికరించలేదు. నువ్వే చేశావని ఒప్పుకో... లేకపోతే విడిచేదే లేదు అంటూ చెట్టుకు కట్టి మరీ ఓ వ్యక్తిని కొట్టారు. ఈ ఘటన కడప జిల్లా ముద్దనూరులో జరిగింది.

కడప జిల్లా ముద్దనూరులో కర్ణాటకు చెందిన ఓ డ్రైవర్​ను చెట్టుకు కట్టి... గుర్రప్ప ట్రాన్స్​పోర్ట్ యజమాని తన అనుచరులతో విచక్షణారహితంగా కొట్టించాడు. తన ట్రాన్స్​పోర్ట్​లో డ్రైవర్​గా పని చేస్తున్న సదరు వ్యక్తి.. సిమెంట్ బస్తాలు దొంగలించాడనే నెపంతో చెట్టుకు కట్టి కొట్టారు. బాధిత డ్రైవర్ తనకు ఏమీ తెలియదనీ.. తనను వదిలివేయాలని ఎంత వేడుకున్నా.. వారు కనికరించలేదు. ఈ అమానవీయ ఘటన ఈ బుధవారం జరగ్గా.. ఇప్పుడు వెలుగులోకి వచ్చింది. బాధిత డ్రైవర్​ను వదిలివేసినా.. ఇప్పటికీ ఇంటికి చేరలేదని తెలిసింది. ఈ ఘటనపై జిల్లా పోలీసు ఉన్నతాధికారులు సీరియస్​గా ఉన్నట్లు తెలుస్తోంది. ఈ ఘటనను సుమోటోగా ఎందుకు తీసుకోలేదని ముద్దనూరు పోలీసులను ఉన్నతాధికారులు ప్రశ్నించినట్లు సమాచారం.

ఇదీ చదవండి:రెండు రోజులుగా వర్షాలు..కూలిన కళాశాల గదులు