'ఎవరూ అధైర్య పడవద్దు... పోలీస్ శాఖ అండగా ఉంటుంది'

కరోనా సోకిన వాళ్లెవరూ అధైర్యపడవద్దని.. వారికి పోలీసు శాఖ ఎప్పుడూ అండగా ఉంటుందని... కడప ఎస్పీ అన్బురాజన్ ధైర్యం చెప్పారు. వైరస్ బారినపడినవారు త్వరగా కోలుకుంటున్నారని తెలిపారు. జిల్లాలో కరోనా కేసుల గురించి వివరించారు.

కడప జిల్లాలో కరోనా పాజిటివ్​గా నమోదైన వ్యక్తులు త్వరగా కోలుకుని డిశ్చార్జి అవుతుండడం ఆనందంగా ఉందని... ఎస్పీ అన్బురాజన్ అన్నారు. వైరస్ సోకిన పోలీసు సిబ్బంది ధైర్యంగా ఉండాలని.. త్వరలోనే కోలుకుంటారని ఆశాభావం వ్యక్తంచేశారు. పోలీస్ శాఖ వారికి అండగా ఉంటుందని హామీ ఇచ్చారు. కరోనా కేసులకు సంబంధించి ఒక ప్రకటన విడుదల చేశారు. ఆ ప్రకటన సారాంశం ఇది.

'కొవిడ్ -19 హాట్ స్పాట్​గా ఉన్న ప్రొద్దుటూరులో మొత్తం 29 పాజిటివ్ కేసులు నమోదు అయ్యాయి. వీరిలో 12 మంది కోలుకుని ఇళ్లకు వెళ్లారు. రాష్ట్రంలోనే అత్యధిక వయసున్న ఉన్న ఓ వృద్ధుడు వైరస్ బారిన పడి కోలుకున్నాడు. కడప నగరం ఆలంఖాన్ పల్లికి చెందిన 82 ఏళ్ల వృద్ధుడికి కరోనా సోకింది. అతడికి బీపీ, షుగర్ ఉన్నాయి. గొంతు ఇన్ఫెక్షన్​తో ఆహారం తీసుకునేందుకూ ఇబ్బంది పడేవారు. అయినా కూడా కొవిడ్​తో పోరాడి విజయం సాధించాడు. పూర్తిగా కోలుకుని ఇంటికి వెళ్లాడు.

ఇప్పటివరకూ జిల్లాలో మొత్తం 69 కేసులు నమోదు కాగా వీరిలో 28 మంది వైద్యుల పర్యవేక్షణలో చికిత్స పొందుతూ, పౌష్టికాహారం తీసుకుంటూ, వ్యక్తిగత పరిశుభ్రత పాటిస్తూ కోలుకున్నారు. ప్రొద్దుటూరులో 12, కడపలో ఐదుగురు, పులివెందులలో నలుగురు, వేంపల్లిలో ఇద్దరు, బద్వేలులో ముగ్గురు డిశ్చార్జి అయ్యారు. రాబోయే రోజుల్లో మరింతమంది కరోనా వైరస్ నుంచి కోలుకుంటారు. ఎవరూ అధైర్యపడవద్దని, పోలీసు శాఖ ఎల్లప్పుడూ అండగా ఉంటుంది' అని ప్రకటనలో పేర్కొన్నారు.

ఇవీ చదవండి... పోలీస్​స్టేషన్​ ఎదుట వలస కూలీల ఆకలి కేకలు