కడప జిల్లా బి.కోడూరు మండలం సిద్దుగారిపల్లి గ్రామానికి చెందిన ఇంటర్ విద్యార్థి శ్రీనివాస్ రెడ్డి.. ఆత్మహత్య చేసుకున్నాడు. నిన్న కళాశాల నుంచి ఇంటికి వచ్చిన విద్యార్థి ఉదయానికల్లా ఉరి వేసుకుని మరణించాడు. కాలేజీలో పెట్టే ఒత్తిడి తట్టుకోలేకే ఈ అఘాయిత్యానికి పాల్పడుతున్నట్లు సూసైడ్ నోట్లో పేర్కొన్నాడు. అతని చేతి మీద కూడా ఈ విషయాన్ని రాసుకున్నాడు.
గ్రామానికి చెందిన సుబ్బిరెడ్డి - ప్రమీలమ్మ దంపతుల చివరి సంతానం శ్రీనివాస్ రెడ్డి. జిల్లాలోని ఓ ప్రైవేటు కళాశాలలో ఇంటర్ ద్వితీయ సంవత్సరం చదువుతున్నాడని మృతుని తల్లిదండ్రులు తెలిపారు. 'అమ్మానాన్న నన్ను క్షమించండి. కుటుంబసభ్యులను మిస్సవుతున్నాను' అంటూ శ్రీనివాస్ రెడ్డి రాసిన లేఖ.. వారిని ఆవేదనకు గురిచేస్తోంది. ఎంతో భవిష్యత్తు ఉన్న తమ కుమారుడు ఆత్మహత్య చేసుకోవడంపై కన్నీరుమున్నీరవుతున్నారు.