Heavy Rains in Many Places in AP: ఏపీలో పలుచోట్ల కురిసిన వర్షాలకు జలమయమైన రహదారులు..

Heavy Rains in Many Places in AP: ఏపీలో కొన్ని చోట్ల కురిసిన భారీ వర్షాలకు రహదారులన్నీ జలమయమయ్యాయి. దీంతో పలు ప్రాంతాల్లో రాకపోకలు స్తంభించిపోవటంతో.. ప్రజలు తీవ్ర ఇబ్బందులను ఎదుర్కొంటున్నారు.

Heavy Rains in Many Places in AP: రాష్ట్రంలో కొన్ని ప్రాంతాల్లో కురిసిన వర్షాల కారణంగా ప్రజలు తీవ్ర అవస్థలు ఎదుర్కొంటున్నారు. ఈ క్రమంలో వైఎస్​ఆర్ కడప జిల్లాలో అర్ధరాత్రి నుంచి తెల్లవారుజామున వరకు ఎడతెరిపి లేకుండా భారీ వర్షం కురిసింది. అత్యధికంగా చెన్నూరు మండలంలో 168 మిల్లీమీటర్ల వర్షపాతం నమోదైంది. ఏకధాటిగా కురిసిన వానకు లోతట్లు ప్రాంతాలు జలమయమయ్యాయి. కడప నగరంలోని రోడ్లన్నీ చెరువులను తలపిస్తున్నాయి. అంబేద్కర్ కూడలి, వై జంక్షన్‌, భరత్ నగర్, ప్రకాష్ నగర్, లోహియా నగర్, గంజికుంట కాలనీలు జలదిగ్బంధంలో చిక్కుకున్నాయి.

నిన్న రాత్రి కురిసిన భారీ వర్షాలతో వైఎస్ఆర్ జిల్లా ఖాజీపేట మీదుగా ప్రవహించే వక్కిలేదు ఉద్ధృతంగా ప్రవహిస్తోంది. రావులపాలెం, కుమ్మర రావులపల్లె గ్రామాలకు రాకపోకలు నిలిచిపోయాయి. వంకలో నీటి ప్రవాహం పెరుగుతూ ఉండడంతో రాకపోకలు సాగకుండా పోలీసులు జాగ్రత్తలు తీసుకున్నారు. వంక ఉద్ధృతి సాయంత్రం వరకు కొనసాగే అవకాశాలు ఉన్నట్లు అంచనా వేస్తున్నారు.

ఈ క్రమంలో జిల్లాలోని కమలాపురం నియోజకవర్గం పెండ్లి మర్రి మండలం తిప్పరాజు పల్లిలో రాత్రి కురిసిన వర్షానికి వంక భారీగా ప్రవహించడంతో ఆ గ్రామస్థులకు తిప్పలు తప్పడం లేదు. రాత్రి కూసిన వర్షానికి తిప్పరాజు పల్లి వంకలో ఆరుగురు చిక్కుకున్నారు. ప్రమాదంలో ఆరుగురు వ్యక్తులను గ్రామస్థులు సురక్షితంగా కాపాడారు. ఈ వంకపై బ్రిడ్జి నిర్మించాలని పలుమార్లు అధికారులు, రాజకీయ నాయకులు దృష్టికి దశాబ్ద కాలంగా తీసుకువెళుతున్నప్పటికీ ఎటువంటి ప్రయోజనం లేదని గ్రామస్థులు ఆవేదన చెందుతున్నారు.

వర్షం వచ్చిన ప్రతిసారి తమకు ఈ తిప్పలు తప్పడం లేదని గ్రామస్థులు వాపోతున్నారు. వర్షం పడిన ప్రతిసారి ఇలా అవస్థలు పడడం తప్ప వేరే మార్గం లేదని అంటున్నారు. అనారోగ్య పరిస్థితిలో ఉన్నవారిని హాస్పిటల్​కు తీసుకునిపోవాలంటే నానా ఇబ్బందులు పడుతున్నామని, ఇప్పటికైనా అధికారులు దీనిపై స్పందించి తమ సమస్యను పరిష్కరించాలని స్థానికులు వేడుకుంటున్నారు.

వర్షం ధాటికి కడప పులివెందుల ప్రధాన రహదారి సైతం నీట మునిగిపోయింది. వరద నీటితో రోడ్లన్నీ చెరువులను తలపిస్తున్నాయి.రోడ్లపై మోకాల్లోతు నీరు చేరి వాహనదారులు తీవ్ర ఇబ్బందులు పడుతున్నారు. కడప ఆర్టీసీ గ్యారేజ్​లోకి భారీగా వరద చేరి కార్మికులు అవస్థలు పడుతున్నారు. మరోవైపు రెండ్రోజులుగా కురుస్తున్న వర్షాల ధాటికి శ్రీ సత్యసాయి జిల్లా కదిరి మండలంలో మద్దిలేరు వాగు ఉద్ధృతంగా ప్రవహిస్తోంది. మద్దిలేరు ప్రవాహం ధాటికి కదిరి మండలం రాజువారి పల్లి తండా వద్ద రాకపోకలు స్తంభించాయి. మద్దిలేరు ఉద్ధృతికి ముదిగుబ్బ మండలం మలక వేమల క్రాస్ నుంచి తలుపుల మండలం బట్రేపల్లికి వెళ్లే మార్గంలో రాకపోకలు నిలిపివేశారు.