అప్పుల బాధలకు మరో రైతు బలవన్మరణం

అప్పుల బాధతో కడప జిల్లాకు చెందిన ఓ రైతు బలవన్మరణానికి పాల్పడ్డాడు. పురుగుల మందు తాగి ఆత్మహత్య చేసుకున్నాడు.

కడప జిల్లా రైల్వే కోడూరు మండలం జంగిటివారిపల్లిలో కొండేటి నాగరాజు(33) అనే రైతు పురుగుల మందు తాగి ప్రాణాలు విడిచాడు. కొన్నాళ్లుగా పంట దిగుబడి లేక అప్పుల్లో కూరుకుపోయాడు. దీనితో మనస్థాపానికి గురైన నాగరాజు సోమవారం రాత్రి పురుగుల మందు తాగి ఆత్మహత్యకు పాల్పడ్డాడని అతని బంధువులు తెలిపారు. వెంటనే అతన్ని కోడూరులోని ఓ ప్రైవేట్ ఆసుపత్రికి తీసుకెళ్లారు. అక్కడి వైద్యుల సూచన మేరకు తిరుపతిలోని ఓ ప్రైవేట్ ఆసుపత్రికి తీసుకెళ్లారు. అక్కడ చికిత్స పొందుతూ రైతు మంగళవారం రాత్రి మృతి చెందాడు. మృతుని భార్య ఉపాధి కోసం రెండు నెలల క్రితం కువైట్​కి వెళ్లింది. బంధువులు ఆమెను గ్రామానికి రప్పించారు. మృతుడికి ఇద్దరు కుమార్తెలు, ఒక కుమారుడు ఉన్నారు.
క్షణికావేశంలో నిర్ణయాలు తీసుకోవద్దు: ఎమ్మెల్యే
నాగరాజు కుటుంబ సభ్యులను వైకాపా ఎమ్మెల్యే కొరముట్ల శ్రీనివాసరావు పరామర్శించారు. రైతులు క్షణికావేశంలో నిర్ణయాలు తీసుకుని ఆత్మహత్యలు చేసుకోవటం మంచిది కాదని ఎమ్మెల్యే అన్నారు. సమస్యలుంటే ప్రభుత్వం దృష్టికి తీసుకురావాలని సూచించారు.