Couple suicide attempt: వైయస్‌ఆర్‌ జిల్లా పులివెందుల నియోజకవర్గంలో వైకాపా నేతల అక్రమ కేసులతో మనస్తాపం చెందిన తెదేపాకు చెందిన దంపతులు గురువారం ఆత్మహత్యకు యత్నించారు. చక్రాయపేట మండలం చెరువుకాంపల్లెలో తెదేపా కార్యకర్తలు రామాంజనేయులు, కృష్ణవేణి దంపతులు ఇటీవల తెదేపా అధినేత చంద్రబాబునాయుడి పుట్టినరోజు సందర్భంగా గ్రామంలో కేక్ కట్‌చేసి వేడుకలు నిర్వహించారు. ఇది గిట్టని స్థానిక వైకాపా నేత సురేష్‌.. తన భార్య పద్మజ పేరిట దంపతులపై అక్రమ కేసులు బనాయించినట్లు బాధితుల బంధువులు ఆరోపిస్తున్నారు.
పోలీసుస్టేషన్‌కు రావాలంటూ సచివాలయం మహిళా కానిస్టేబుల్‌ ఒత్తిడి తేవడంతో మనస్తాపం చెందిన దంపతులు పురుగుల మందు తాగి ఆత్మహత్యకు యత్నించారు. వీరిపై గతంలోనూ రెండు అక్రమ కేసులు పెట్టారని, తరచూ పోలీసులు ఇంటికి రావడాన్ని అవమానంగా భావించి.. ఈ అఘాయిత్యానికి పాల్పడ్డారని చెబుతున్నారు. బాధితులకు వేంపల్లె ప్రభుత్వాసుపత్రిలో ప్రథమ చికిత్స చేయించి, తర్వాత కడప ప్రభుత్వ సర్వజన ఆసుపత్రికి తరలించారు.
రామాంజనేయులు దంపతులు బలవన్మరణానికి యత్నించడం నేరమని.. ఎస్సై మల్లికార్జునరెడ్డి పేర్కొన్నారు. వీరి చర్యలతో పద్మజ ఆత్మహత్యాయత్నం చేశారని, ఆ ఘటనతో కేసు అవుతుందని భయపడి వీరు ఈ అఘాయిత్యానికి పాల్పడి ఉండవచ్చునని వివరించారు. వారి కుటుంబ గొడవలు కూడా కారణం కావొచ్చని పేర్కొన్నారు.