కరోనా ఎఫెక్ట్: కళాకారుల కష్టాలు.. తీర్చేవారి కోసం ఎదురుచూపులు

మన సమాజంలో కళలకు, కళాకారులకు ప్రత్యేక స్థానం ఉంది. ప్రభుత్వాలు, అధికారులు పట్టించుకోకపోయినా కళలు మరుగున పడిపోకుండా వారు చేస్తున్న కృషి మరువలేనిది. అలాంటి కళాకారుల పరిస్థితి దయనీయంగా మారింది. కరోనా ప్రభావంతో ఈ ఏడాది మార్చి నుంచి కార్యక్రమాలు లేక పస్తులతో జీవనం సాగిస్తున్నారు . అర్హులైనా... చాలా మందికి పింఛన్లు అందడం లేదు. ఇంటి స్థలాలు లేవు, కనీసం గుర్తింపు కార్డులు లేక బతుకు అగమ్యగోచరంగా మారిందని ఆవేదన వ్యక్తంచేస్తున్నారు.

కడప జిల్లాలో గుర్తింపు పొందిన కళాకారుల సంఘాలు 20 ఉన్నాయి. గుర్తింపు పొందని నాట్యమండళ్లు 40 వరకు ఉన్నాయి. జిల్లావ్యాప్తంగా సుమారు 3 వేల మంది నాట్యమండళ్లను నమ్ముకుని జీవనం సాగిస్తున్నారు. మరికొంతమంది ప్రభుత్వ, ప్రైవేటు ఉద్యోగాలు చేస్తూ ఈ రంగంపై మక్కువతో కళలు ప్రదర్శిస్తున్నారు. ఈ ఏడాది మార్చి నుంచి కరోనా కారణంగా దేశవ్యాప్తంగా లాక్ డౌన్ విధించారు. నాటకాలు ఆగిపోయి కళాకారులకు పని లేకుండా పోయింది. దీంతో వారి బతుకులు ఆర్థికంగా చితికిపోయాయి.

ప్రదర్శనలు లేక.. ఆదాయం రాక

జిల్లాలో కడప, ప్రొద్దుటూరు, జమ్మలమడుగు, పులివెందుల, కమలాపురం, బద్వేలు తదితర ప్రాంతాల్లో కళాకారులు ఎక్కువగా ఉన్నారు. వీరంతా పౌరాణికం, సాంఘిక నాటకాలు ప్రదర్శించి దాని ద్వారా వచ్చే డబ్బులతో కుటుంబాన్ని పోషించేవారు. హార్మోనిస్టులు, తబలా వాయించేవారు. లైట్​మెన్... తదితర కళాకారులు ఈ రంగంపై ఆధారపడినవారే. వేసవి కాలంలో నాటకాల సీజన్. అయితే అదే సమయంలో కరోనా ప్రబలి కార్యక్రమాలన్నీ ఆగిపోయాయి. అప్పటినుంచి వీరి జీవనం కళతప్పింది. ప్రదర్శనలు లేక, ఆదాయం రాక కష్టాలు పడుతున్నారు. ముఖ్యమంత్రి స్పందించి తమను ఆదుకోవాలని కోరుతున్నారు.

ఇక్కడి కళాకారులకు ఇతర జిల్లాల్లోనూ మంచి పేరుంది. వేదికలపై వారు ఇచ్చే ప్రదర్శనలకు చప్పట్లు మారుమోగేవి. అయితే ప్రస్తుతం పనిలేక వారి జీవనభృతి ఆగిపోయింది. ప్రజాప్రతినిథులు, ప్రభుత్వాలు కనికరించి తమను ఆదుకోవాలని విజ్ఞప్తి చేస్తున్నారు.

ఇవీ చదవండి..