MAA NAMMAKAM NUVVE JAGAN: 2024 ఎన్నికల్లో మరలా వైఎస్సార్సీపీ ప్రభుత్వం అధికారంలోకి రావడానికి ఇప్పటి నుంచి ప్రయత్నాలను ముమ్మరం చేసింది. అందులో భాగంగానే 'మా నమ్మకం నువ్వే జగన్' కార్యక్రమాన్ని ప్రారంభించింది. జగన్ ప్రభుత్వం సంక్షేమ పథకాల ద్వారా లబ్ధి పొందిన వారి ఇళ్లకు 'మా నమ్మకం నువ్వే జగన్' అనే ట్యాగ్తో కూడిన స్టిక్కర్ను అతికించనున్నారు. ఈ కార్యక్రమంపై పలు రాజకీయ నాయకులు జగన్పై తీవ్ర విమర్శలు చేస్తున్నారు. తాజాగా కాంగ్రెస్ పార్టీ మీడియా ఛైర్మన్‌ తులసి రెడ్డి ఘాటుగా స్పందించారు.
జగన్ స్టిక్కర్ పార్టీకి స్టిక్తో సమాధానం: ముఖ్యమంత్రి జగన్ మోహన్ రెడ్డి ని తన కుటుంబ సభ్యులే నమ్మడం లేదని కాంగ్రెస్ పార్టీ మీడియా ఛైర్మన్‌ తులసి రెడ్డి ధ్వజమెత్తారు. వైఎస్సార్ జిల్లా వేంపల్లి లో కాంగ్రెస్ పార్టీ నాయకులు తులసి రెడ్డి మాట్లాడుతూ మా నమ్మకం నువ్వే జగన్ అనే స్టిక్కర్ ను ప్రతి ఇంటికీ అతికించాలని జగన్ నిర్ణయించడం హాస్యాస్పదంగా ఉందని అన్నారు. జగన్ కు ఓటమి భయం పట్టుకుందని ఎద్దేవా చేశారు. అందుకే స్టిక్కర్ లు అతికించాలని నిర్ణయంచారని అన్నారు. అసలు జగన్ ను ఎందుకు నమ్మాలి అని ఆయన సూటిగా ప్రశ్నించారు. రాష్ట్రాన్ని అప్పుల ఆంధ్ర ప్రదేశ్ గా, అవినీతి, అరాచక, ఆంధ్ర ప్రదేశ్ గా మార్చినందుకా , లేక మద్యం, జూదం ఆంధ్ర ప్రదేశ్ గా మార్చినందుకా అని ప్రశ్నించారు. రైతులను ,మహిళలను, ఉద్యోగులను, నిరుద్యోగులను, విద్యార్థులను, సర్పంచులను, కాంట్రాక్టర్లను నమ్మించి మోసగించి నందుకా అని అన్నారు. కనీసం నీ కుటుంబ సభ్యులే నిన్ను నమ్మడం లేదు. ఇతరులు ఎలా నమ్ముతారు అని ధ్వజమెత్తారు. జగన్ స్టిక్కర్ పార్టీని ప్రజలు స్టిక్ తో తరిమి తరిమి కొడతారని తులసి రెడ్డి జోస్యం చెప్పారు.