Conflicts in YSRCP: రాయలసీమలో.. అధికార వైసీపీ పార్టీలోని అంతర్గత విభేదాలు వీధికెక్కుతున్నాయి. అసమ్మతి, అసంతృప్తి జ్వాలలు ఎగసిపడుతున్నాయి. ఈ ఎమ్మెల్యేలు మాకొద్దంటూ కొన్నిచోట్ల అసమ్మతి నేతలు రోడ్డుకెక్కుతుంటే.. మరికొన్నిచోట్ల అవినీతిని అసమ్మతి వర్గాలు రచ్చకీడుస్తున్నాయి. టికెట్ల కోసం వర్గపోరు అంతకంతకూ ఉద్ధృతమవుతుండటం.. అధికార పార్టీకి తలనొప్పిగా మారింది. ''రాష్ట్రంలో అసమ్మతి లేని నియోజకవర్గమే లేదు. నాకూ ఉంది, ముఖ్యమంత్రి నియోజకవర్గంలోనూ అసమ్మతి ఉంది''..!.. ఇవి రాప్తాడు నియోజకవర్గ వైసీపీ విస్తృత స్థాయి సమావేశంలో.. మంత్రి పెద్దిరెడ్డి రామచంద్రారెడ్డి చేసిన వ్యాఖ్యలివి. వైసీపీలో పెద్దాయనగా పిలిచే.. ఆ పార్టీ ప్రాంతీయ సమన్వయకర్త అయిన ఆయనే చేసిన ఈ వ్యాఖ్యలు.. పార్టీలో కుమ్ములాటలు ఏ స్థాయిలో ఉన్నాయనేదానికి నిదర్శనం. ఇదొక్కటే కాదు.. వైసీపీకు 2019 ఎన్నికల్లో భారీగా సీట్లు ఇచ్చిన రాయలసీమలో ఇప్పుడు ఎటు చూసినా అసంతృప్తి సెగలే. అత్యధిక చోట్ల అధికార వైసీపీలో వర్గవిభేదాలు రచ్చకెక్కుతున్నాయి. పెనుకొండ ఎమ్మెల్యే, మాజీ మంత్రి శంకరనారాయణ మాకొద్దు.. వచ్చే ఎన్నికల్లో ఆయనకు టికెట్ ఇస్తే సహించమంటూ అసమ్మతి వర్గం రోడ్డెక్కింది. మంత్రి పెద్దిరెడ్డి రామచంద్రారెడ్డి నియోజకవర్గ సమీక్షకు వస్తే ఆయన కాన్వాయ్‌ను అడ్డుకుంది. ఈ సందర్భంగా కొందరు పెద్దిరెడ్డి వైపు ఏకంగా చెప్పులు విసిరారు. స్థానిక నేతలు రమణారెడ్డి, సుధాకర్‌రెడ్డి, నాగభూషణరెడ్డి, నారాయణరెడ్డి, సంజీవరెడ్డి, శ్రీనివాసులు సహా పలువురు.. ఎమ్మెల్యేను తీవ్రంగా వ్యతిరేకిస్తున్నారు.
కదిరిలో లేచిన కుర్చీలు: కదిరిలో ఎమ్మెల్యే సిద్ధారెడ్డి, వైసీపీ కార్యనిర్వాహక కమిటీ సభ్యుడు పూల శ్రీనివాసరెడ్డి వర్గాలు ఇటీవల నియోజకవర్గ విస్తృతస్థాయి సమావేశంలో కుర్చీలు ఎత్తి కొట్టుకోబోయారు. పరస్పరం చెప్పులూ విసురుకున్నారు. ఎమ్మెల్యే తన ఒంటెత్తు పోకడలతో పార్టీలో ఎవరినీ కలుపుకుని వెళ్లడం లేదంటూ శ్రీనివాసరెడ్డి.. కదిరి ఆసుపత్రి భవన నిర్మాణ శంకుస్థాపన కార్యక్రమం వేదికపైనే ఆరోపణలు చేశారు.
సోదరుడిపైనే పోరాటం: ఉరవకొండ నియోజకవర్గ వైసీపీ సమన్వయకర్త విశ్వేశ్వరరెడ్డిపై ఆయన సోదరుడైన వైసీపీ రాష్ట్ర కార్యదర్శి మధుసూదన్‌రెడ్డే పోరాటం ప్రకటించారు. విశ్వేశ్వరరెడ్డి కుమారుడు ప్రణయ్‌రెడ్డి.. నియోజకవర్గంలో అన్నీ తానై వ్యవహరించడమే కుటుంబంలో చిచ్చు పెట్టిందంటున్నారు. విశ్వేశ్వరరెడ్డి సోదరుడు మధుసూదన్‌రెడ్డి కుమారుడు అవినాష్‌, మరో సోదరుడు రవీంద్రనాథ్‌రెడ్డి కుమారుడైన నిఖిల్‌నాథ్‌రెడ్డి కారణంగానే.. తన తండ్రి 2019లో ఓడిపోయారంటూ ప్రణయ్‌ ఆరోపిస్తున్నారు. వీరి మధ్య మాటామాటా పెరిగి.. అవినాష్‌, నిఖిల్‌నాథ్‌ కలిసి.. ప్రణయ్‌పై దాడికి దిగేదాకా వెళ్లింది. ఆ సమయంలో తన పక్కనున్న అనుచరుడితో అవినాష్‌, నిఖిల్‌నాథ్‌పై.. ప్రణయ్‌ ఎస్సీ-ఎస్టీ అట్రాసిటీ కేసు పెట్టించడం కలకలం రేపింది. విశ్వేశ్వర్‌రెడ్డి వ్యవహార శైలి వల్లే ఉరవకొండలో వైసీపీ ఓడిపోయిందంటూ.. నియోజకవర్గ విస్తృతస్థాయిలో సమావేశంలో మంత్రి పెద్దిరెడ్డి రామచంద్రారెడ్డి ఎదుటే.. మధుసూదన్‌రెడ్డి కుండబద్దలు కొట్టారు. అటు.. ఎమ్మెల్సీ శివరామిరెడ్డి నియోజకవర్గంలో ప్రభావం చూపగలరన్న కారణంతో ఆయన వర్గాన్ని విశ్వేశ్వరరెడ్డి వర్గం అణచివేసే పనిలో పడింది. శివరామిరెడ్డి దగ్గరకెళ్లినా, ఆయనతో మాట్లాడినా సంక్షేమ పథకాలు అందవు, పనులూ జరగవంటూ.. విశ్వేశ్వరరెడ్డి వర్గం హుకుం జారీ చేసిందని సమాచారం.
అవినీతి చక్రవర్తి మాకొద్దు: మడకశిరలో ఎమ్మెల్యే తిప్పేస్వామిని వైసీపీ రాష్ట్ర సంయుక్త కార్యదర్శి రవిశేఖర్‌రెడ్డి, గోవర్ధన్‌రెడ్డి వర్గం వ్యతిరేకిస్తోంది. మాజీ మంత్రి నరసేగౌడ్, మాజీ ఎమ్మెల్సీ ప్రభాకర్‌ రెడ్డి, హనుమంతరాయుడు, గుడిబండలో నరసింహప్ప.. ఇలా ఎమ్మెల్యేకు వ్యతిరేకంగా పలు వర్గాలు కొనసాగుతున్నాయి. ప్రతి పనికీ ఎమ్మెల్యే డబ్బు వసూలు చేస్తున్నారని.. ఎవరైనా ప్రశ్నిస్తే ఎస్సీ-ఎస్టీ అట్రాసిటీ కేసుల పేరుతో బెదిరిస్తున్నారని.. అవినీతి చక్రవర్తి అయిన ఈ ఎమ్మెల్యే మాకొద్దంటూ.. వచ్చే ఎన్నికల్లో ఆయనకు టికెట్ ఇస్తే అంగీకరించబోమని.. అసమ్మతివర్గం నియోజకవర్గ విస్తృతస్థాయి సమావేశానికి వచ్చిన మంత్రి పెద్దిరెడ్డి రామచంద్రారెడ్డి ముందే తెగేసి చెప్పింది. ఎమ్మెల్యే సామాజికవర్గానికి చెందిన కొందరు నేతలు కూడా ఆయన్ను బహిరంగంగానే విమర్శించారు.
కొత్తగా బెంగళూరు దీప: హిందూపురంలో.. ప్రస్తుత సమన్వయకర్త, ఎమ్మెల్సీ మహమ్మద్‌ ఇక్బాల్‌కు వ్యతిరేకంగా రెండు వర్గాలు గట్టిగా పనిచేస్తున్నాయి. 2014లో పోటీ చేసి ఓడిపోయిన నవీన్‌ నిశ్చల్‌ మళ్లీ టికెట్ కోసం వేగంగా రాజకీయ కార్యకలాపాలు నిర్వహిస్తున్నారు. పార్టీ ఆవిర్భావ సమయంలో నియోజకవర్గ సమన్వయకర్తగా వ్యవహరించి, తర్వాత వెనక్కి తగ్గిన రామకృష్ణారెడ్డి.. ఇటీవల హత్యకు గురయ్యారు. ఆయన అక్క చౌళూరి మధుమతి ఇప్పుడు హిందూపురం నుంచి పోటీకి తీవ్రంగా ప్రయత్నాలు చేస్తూ వర్గాన్ని కూడగట్టుకుంటున్నారు. మంత్రి పెద్దిరెడ్డి రామచంద్రారెడ్డి సమావేశం నిర్వహించినప్పుడు ఇక్బాల్‌కు టికెట్ ఎలా ఖరారు చేస్తారంటూ మధుమతి వర్గీయులు కేకలేస్తూ నిరసన తెలిపారు. మరోవైపు కొత్తగా బెంగళూరుకు చెందిన వేణుగోపాలరెడ్డి భార్య దీప.. హిందూపురం ఎంపీ లేదా ఎమ్మెల్యే టికెట్ కోసమంటూ రంగంలోకి దిగారు.
నచ్చని రోజా: ఇక మంత్రి రోజాకు నగిరి మున్సిపాలిటీలోని నాయకులతోపాటు ఆ నియోజకవర్గ పరిధిలోని 5 మండలాల నేతలతోనూ విభేదాలున్నాయి. పార్టీ పదవుల్లో ప్రాధాన్యం కల్పించలేదని విజయపురంలో వైసీపీ సీనియర్ నేత లక్ష్మీపతిరాజు వ్యతిరేకిస్తున్నారు. వడమాలపేటలో.. రోజా అన్న రాంప్రసాద్‌రెడ్డి పెత్తనం చేస్తున్నారని.. స్థానిక జడ్పీటీసీ సభ్యుడు మురళీధర్‌రెడ్డి కారాలుమిరియాలు నూరుతున్నారు. పత్తిపుత్తూరు సచివాలయం భవన ప్రారంభోత్సవం సందర్భంగా.. నిర్మాణానికి సంబంధించిన బిల్లులు తనకు రాలేదని.. ప్రారంభించడానికి వీల్లేదంటూ భవనానికి మురళీధర్‌రెడ్డి తాళాలు వేశారు. రోజా ఆ తాళాలు పగలకొట్టించి భవనాన్ని ప్రారంభించారు. ఆ సమయంలో మురళీధర్‌ను రేణిగుంట మండలం గాజులమండ్యం పోలీస్‌స్టేషన్‌కు తరలించారు. నిండ్రలో.. శ్రీశైలం దేవస్థానం బోర్డు ఛైర్మన్‌ చక్రపాణిరెడ్డి, కొప్పేడు ఎంపీటీసీ భాస్కర్‌రెడ్డితో.. రోజాకు వర్గపోరు నడుస్తోంది. తనను ఎంపీపీగా చేస్తానని హామీ ఇచ్చి మంత్రి మాట తప్పారన్నది భాస్కర్‌రెడ్డి ఆరోపణ. ఇటీవల మంత్రిని ఆహ్వానించకుండానే.. కొప్పేడులో రైతుభరోసా కేంద్రం, సచివాలయ భవనానికి.. చక్రపాణిరెడ్డి, భాస్కర్‌రెడ్డి, ఈడిగ కార్పొరేషన్‌ ఛైర్మన్‌ కేజే శాంతి, ఆమె భర్త కేజే కుమార్‌ భూమిపూజ చేశారు. పుత్తూరులో వైసీపీ రాష్ట్ర బీసీ సల్ కార్యదర్శి ఏలుమలై, నగరిలో శాంతి, ఆమె భర్త కుమార్‌.. పార్టీలో తమకు ప్రాధాన్యం ఇవ్వడం లేదని.. మంత్రి రోజాపై అసంతృప్తిగా ఉన్నారు.
33 మందిలో ఎంత మంది ఉన్నారో: మంత్రి పెద్దిరెడ్డి రామచంద్రారెడ్డి ఆశీస్సులతో 2019లో మదనపల్లెలో అనూహ్యంగా టికెట్ తెచ్చుకుని, ఎమ్మెల్యే అయిన నవాజ్‌ బాషా ఇప్పుడు ఒంటరయినట్లే కనిపిస్తోంది. మదనపల్లె మున్సిపాలిటీలో ఎమ్మెల్యే ఇచ్చిన టికెట్‌తో గెలిచిన 33 మంది కౌన్సిలర్లలో నలుగురైదుగురు మాత్రమే ఇప్పుడు ఆయనతో ఉంటున్నారు. ఛైర్పర్సన్ ఉన్నా మున్సిపాలిటీపై పెత్తనమంతా ఎమ్మెల్యేదే. ఛైర్పర్సన్, ఆమె భర్త అసంతృప్తిని బయటపెట్టకపోయినప్పటికీ ఇబ్బంది పడుతున్నారంటున్నారు. కౌన్సిల్‌ సమావేశమూ ఎమ్మెల్యే కనుసన్నల్లోనే జరగాలని, కౌన్సిలర్లు ఎమ్మెల్యేకు తెలియకుండా మాట్లాడకూడదనే పరిస్థితి ఉండడంతో.. వారు మెల్లగా పక్కకు జరుగుతున్నారు. ఇటీవల పెద్దిరెడ్డి సోదరుడి కుమారుడు సుధీర్‌రెడ్డిని నియోజకవర్గ పర్యవేక్షకుడిగా నియమించి చివరి నిమిషంలో వేరొకరిని తీసుకువచ్చారు.
పార్టీతో సంబంధం లేదు: తంబళ్లపల్లిలో మండలస్థాయి నాయకులు.. ఎమ్మెల్యే పెద్దిరెడ్డి ద్వారకనాథరెడ్డి.. ఆయన బంధువు భానుప్రకాష్‌రెడ్డి వ్యవహారశైలితో అసంతృప్తి, అసమ్మతితో రగులుతున్నారు. అయితే మంత్రి పెద్దిరెడ్డి రామచంద్రారెడ్డితో ఎందుకులే.. అనే భయంతోనే బయటపడటం.. లేదంటున్నారు. వీరిలో చాలా మందికి ఎమ్మెల్యేతో సఖ్యత లేదు. మరోవైపు పార్టీ పేరుతో సంబంధం లేకుండా మాజీ ఎమ్మెల్యే ప్రవీణ్‌కుమార్‌రెడ్డి, ఆయన తల్లి లక్ష్మీదేవమ్మ రాజకీయ, వ్యక్తిగత కార్యక్రమాలూ నిర్వహిస్తున్నారు.