తెదేపా నేత చింతమనేని ప్రభాకర్ అరెస్ట్

తెదేపా ఎమ్మెల్యే అచ్చెన్నాయుడు అరెస్టును నిరసిస్తూ ఆందళన చేపట్టేందుకు వస్తున్న ఆ పార్టీ నేత చింతమనేని ప్రభాకర్​ను పోలీసులు ముందస్తు అరెస్టు చేశారు. ఈ క్రమంలో పోలీసు వాహనాన్ని అడ్డుకుని తెదేపా కార్యకర్తలు ధర్నా చేపట్టారు.

తెదేపా ఎమ్మెల్యే అచ్చెన్నాయుడును అవినీతి నిరోధకశాఖ అధికారులు అరెస్టు చేసిన విషయం తెలిసిందే. అయితే ఆయన అరెస్టును నిరసిస్తూ.. దెందులూరు మాజీ ఎమ్మెల్యే చింతమనేని ప్రభాకర్ ఆందోళన చేపట్టేందుకు సిద్ధమయ్యారు. ఈ క్రమంలో చింతమనేని ప్రభాకర్​ను ముందస్తుగా పోలీసులు అదుపులోకి తీసుకున్నారు.

పశ్చిమగోదావరి జిల్లా పెదపాడు మండలం కలపర్రు టోల్​గేటు వద్ద పోలీసులు భారీగా మోహరించి ..చింతమనేనిని బలవంతంగా అరెస్టు చేశారు. దెందులూరు నుంచి కలపర్రుకు చింతమనేని వస్తున్నారన్న సమాచారం తెలుసుకున్న పోలీసులు ఆయన వాహనాన్ని అడ్డుకున్నారు. వాహనంలో నుంచి బలవంతంగా కిందకు దించి పోలీసు వాహనంలోకి ఎక్కించారు. ఈ క్రమంలో తెదేపా కార్యకర్తలు పెద్ద ఎత్తున అక్కడకు చేరుకుని పోలీసు వాహనాన్ని అడ్డగించి ధర్నా చేపట్టారు. చింతమనేనిని విడుదల చేయాలంటూ డిమాండ్ చేశారు. చింతమనేనిని అరెస్టు చేసిన పోలీసులు ఆయన్ను ఎక్కడికి తీసుకెళ్లింది వెల్లడించలేదు.

ఇదీ చదవండి:పూర్తి వేతనాలు చెల్లించని కంపెనీలపై చర్యలొద్దు: సుప్రీం