పశ్చిమ గోదావరి జిల్లా నరసాపురం మండలం బియ్యపుతిప్ప నుంచి మొగల్తూరు మండలం మోళ్ళపర్రు వరకు 19 కిలో మీటర్ల మేర సముద్ర తీరం విస్తరించి ఉంది. ఆ తీరాన్ని ఆనుకుని ఉన్న 9 గ్రామల ప్రజలుకు ఉప్పు సాగే జీవనాధారం. జనవరిలో ప్రారంభమైన ఉప్పు సాగు మార్చి మొదటి వారంలో అందుబాటులోకి వస్తుంటుంది. చేతికి అంది వచ్చిన సాగును అమ్ముకునేందుకు రైతులు ఉప్పును గట్టుకు తరలించి గుట్టలు పోసి సిద్దం చేస్తుంటారు.
ఈ సమయంలో కరోనా వైరస్ వ్యాప్తితో ప్రభుత్వం లాక్ డౌన్ విధించింది. ఈ నేపథ్యంలో ఎగుమతులు లేక ఉప్పు గుట్టలుగానే నిలిచిపోయింది. మంచి సీజన్ సమయంలో విక్రయాలు సాగాల్సిన ఉప్పు పంటను కొనే నాధుడు లేక.. దిక్కుతోచని స్థితిలో రైతులు కొట్టుమిట్టాడుతున్నారు.
పంటగా గుర్తించని ప్రభుత్వం...
ఇప్పటి వరకు ఉప్పు సాగును ప్రభుత్వం పంటగా గుర్తించ లేదు. అప్పులు చేసి రైతులు ఉప్పు సాగు చేస్తుంటే పంట చేతికొచ్చిన తర్వాత వ్యాపారులు నచ్చిన ధరకు తీసుకుంటున్నారు. మద్దతు ధర అడిగితే అప్పులు తీర్చాలని ఒత్తిడి చేస్తున్నారు. ఇలా దళారుల దందా, తూకాల్లో మోసాలు, వడ్డీ వ్యాపారుల ఆగడాలతో ఉప్పు రైతులు తీవ్రంగా నష్టపోతున్నారు. నేటికీ ఉప్పు మడులు వద్దకు వెళ్ళేందుకు సరైన రవాణా మార్గాలు లేవు. విద్యుత్ సౌకర్యం లేదు. ఉప్పును భద్రపరిచే గోదాములూ లేవు. ఫలితంగా పంటను రహదారి సమీపంలోకి తరలించడం భారంగా మారుతోంది.