పింఛను రాలేదని జంగారెడ్డిగూడెంలో అందోళన చేస్తున్న లబ్ధిదారులు
ప్రభుత్వం అందించే పింఛను ఈ నెల చాలమంది లబ్ధిదారులకు రాలేదు. అనేక కారణాలతో వారికి పింఛను సొమ్మును అధికారులు ఆపేశారు. మందులు తెచ్చుకోవాలన్నా, నాలుగు మెతుకులు తినటానికి అంగట్లో సరుకులు కొనాలన్నా, పండగకు మనవళ్లకు పదో పరకో ఇవ్వాలన్నా, వృద్ధులు, విభిన్న ప్రతిభావంతులకు ఆధారం ఆ పింఛను సొమ్మే. అలాంటిది అధికారులు కరెంట్ మీటర్ రీడింగ్ 300 యూనిట్లు వస్తుందని... 3 సెంట్లలో ఇల్లు ఉందని కారణాలు సాకుగా చూపి తమ పొట్ట కొట్టారని ఆవేదన వ్యక్తం చేస్తున్నారు. పశ్చిమగోదావరి జిల్లా జంగారెడ్డిగూడెంలో పింఛను అందని బాధితులంతా ప్రభుత్వానికి వ్యతిరేకంగా నినాదాలు చేస్తూ ... తమకు పెన్షన్ ఇప్పించండని వాపోయారు.