పశ్చిమ గోదావరి జిల్లా ఉండ్రాజవరం మండలం సూర్యారావుపాలెం ప్రాథమిక వ్యవసాయ సహకార పరపతి సంఘంలో.. నిధులు దుర్వినియోగం జరిగినట్లు అధికారులు నిర్ధారించారు. 3.86 కోట్ల రూపాయల అవకతవకలు చోటుచేసుకున్నాయని తెలిపారు. బాధ్యుల ఆస్తులను జప్తు చేసి.. సివిల్, క్రిమినల్ చర్యలు తీసుకోవడానికి సన్నద్ధమవుతున్నారు.
సూర్యారావుపాలెం సహకార సంఘంలో కొత్త పాలకవర్గం అధికారంలోకి వచ్చిన తర్వాత.. నిధులు దుర్వినియోగం జరిగినట్లు గుర్తించి అధికారుల దృష్టికి తీసుకెళ్లారు. భారీ స్థాయిలో అవకతవకలు ఉన్నట్లు గమనించిన అధికారులు.. సెక్షన్ 51 ప్రకారం విచారణ జరిపారు. ఆ నిధుల్లో 14 లక్షల రూపాయలు రికవరీ చేశారు. మిగిలిన 2.80 కోట్ల రూపాయలను మాజీ అధ్యక్షులు, కార్యదర్శి స్వాహా చేశారని నిర్ధారణకు వచ్చారు. మరో 70 లక్షల రూపాయలను మాయం చేయడంలో డైరెక్టర్ల పాత్ర ఉన్నట్లు తెలిపారు. 22 లక్షల రూపాయలను సంఘంలో పనిచేసే సేల్స్ మెన్లు సొంతానికి వాడుకున్నారన్నారు.