9 కాదు 10 హత్యలు..!

తెలంగాణలో సంచలనం రేకెత్తించిన 9 హత్యల ఘటనలో కొత్త కోణం వెలుగు చూసింది. నిందితుడు గతంలో మరో యువతిని హత్య చేసినట్లు పోలీసుల విచారణలో తేలింది.

తెలంగాణలోని వరంగల్‌ గొర్రెకుంట ఘటనలో మరో కొత్త కోణం బయటపడింది. తవ్వినకొద్దీ కొత్త విషయాలు వెలుగుచూస్తున్నాయి. తొమ్మిది మందే కాదు అంతకు ముందు ఓ యువతిని చంపేసినట్టు కిల్లర్ సంజయ్ పోలీసులకు విచారణలో వెల్లడించాడు.

మక్సూద్ బంధువైన యువతి సంజయ్​కి సన్నిహితంగా ఉండేది. కొన్నాళ్లుగా ఆమె కనిపించకుండా పోయింది. ఈ తొమ్మిది హత్యల విచారణలో పోలీసులు మరో నిజం కక్కించారు. మార్చి 8న ఓ యువతిని పశ్ఛిమగోదావరి జిల్లా నిడదవోలు వద్ద హత్య చేసినట్లు నిందితుడు అంగీకరించాడు.

కోల్‌కతా తీసుకెళ్తున్నానని చెప్పి ఆ యువతిని రైలు నుంచి తోసేసినట్లు సంజయ్​కుమార్​ ఒప్పుకున్నాడు. పోలీసులకు చెబుతారనే భయంతో మక్సూద్​ కుటుంబాన్ని హతమార్చాడు. ఇలా మొత్తం 10 మందిని హత్య చేశాడు. ఇవాళ నిందితుడు సంజయ్‌ను వరంగల్‌ సీపీ సాయంత్రం 4 గంటలకు మీడియా ముందు ప్రవేశపెట్టనున్నారు.