మంత్రి తానేటి వనిత కాన్వాయ్‌ ఢీకొని వ్యక్తి మృతి
మంత్రి తానేటి వనిత కాన్వాయ్‌ ఢీకొని ఓ వ్యక్తి ప్రాణాలు కోల్పోయాడు. బుధవారం పశ్చిమగోదావరి జిల్లా భీమడోలులోని కనకదుర్గమ్మ ఆలయ సమీపంలో ఈ విషాద ఘటన జరిగింది. ద్విచక్ర వాహనంపై వెళ్తున్న వృద్ధుడిని మంత్రి కాన్వాయ్‌లోని ఎస్కార్ట్ వాహనం వెనుక నుంచి ఢీకొట్టింది. ఈ ఘటనలో ద్విచక్రవాహనం అదుపుతప్పగా.. ఆ వెంటనే మంత్రి ఇన్నోవా కారు ఎస్కార్ట్ వాహనం తప్పించబోయి డివైడర్‌ పైకి దూసుకెళ్లింది. భీమవరం ప్రాంతానికి చెందిన 70ఏళ్ల కలసూరి వెంకటరామయ్య ప్రమాదంలో అక్కడిక్కడే మృతిచెందాడు. మంత్రికి స్వల్ప గాయాలయ్యాయి. కారు ముందు భాగం దెబ్బతింది. పోలీసులు ఘటనపై విచారణ చేస్తున్నారు.