పశ్చిమ గోదావరి జిల్లాను వానలు ముంచెత్తాయి. భారీ వర్షాలకు ఇద్దరు మృతి చెందారు. జిల్లాలో కాల్వలు, వాగులు ప్రమాదకర స్థాయిలో ప్రవహిస్తున్నాయి. జిల్లాలో సగటున 13 సెం.మీ. వర్షపాతం నమోదైనట్లు అధికారులు తెలిపారు. నిడదవోలు, పెరవలి, ఉండ్రాజవరంలో 20 సెంటీ మీటర్లు వర్షపాతం,జిల్లాలోని 11 మండలాల్లో 15 సెంటీ మీటర్లకు పైగా వర్షపాతం నమోదైంది. తమ్మిలేరు, ఎర్రకాలువ, కొవ్వాడ, జల్లేరు జలాశయాల్లోకి వరదనీరు భారీగా చేరింది.
వానలకు ఏలూరు తమ్మిలేరు జలాశయానికి భారీగా వరద చేరుతోంది. ఎర్రకాలువ జలాశయం నుంచి 22 వేల క్యూసెక్కులు, తమ్మిలేరు జలాశయం నుంచి 15 వేల క్యూసెక్కుల నీరు దిగువకు విడుదల చేశారు. ఏలూరు పట్టణంలోని పలు ప్రాంతాలు వరదనీటిలో మునిగిపోయాయి. ఏలూరు రెండోపట్టణ ప్రాంతంలోని వైఎస్‌ఆర్‌ కాలనీ, మాదేపల్లి, శ్రీపర్రు కాలనీలో వరదనీరు ప్రవహిస్తోంది.
పశ్చిమ గోదావరి జిల్లాలో భారీ వర్షాలు... నీట మునిగిన పంటపొలాలు