పశ్చిమగోదావరి జిల్లాను వానలు ముంచెత్తుతున్నాయి. భారీవర్షాలకు జిల్లాలో ఇద్దరు మృతి చెందారు. భారీవర్షాలకు వివిధరకాల పంటలు దెబ్బతిన్నాయి .జిల్లాలో సగటున 13 సెం.మీ. వర్షపాతం నమోదైంది. నిడదవోలు, పెరవలి, ఉండ్రాజవరంలో 20 సెం.మీ. వర్షపాతం నమోదు కాగా.. 11 మండలాల్లో 15 సెం.మీ.కు పైగా వర్షపాతం ఉంది.
కాల్వలు, వాగులు ప్రమాదకరం స్థాయిలో ప్రవహిస్తున్నాయి. తమ్మిలేరు, ఎర్రకాలువ, కొవ్వాడ, జల్లేరుకు వరదనీరు పోటెత్తుతోంది. ఎర్రకాలువ జలాశయం నుంచి 22 వేల క్యూసెక్కుల నీరు విడుదల చేశారు. తమ్మిలేరు జలాశయం నుంచి 16 వేల క్యూసెక్కుల నీరు విడుదల చేస్తున్నారు. కొవ్వాడ జలాశయం నుంచి 3 వేల క్యూసెక్కుల నీరు విడుదల చేశారు. కొవ్వాడ నుంచి నీటి విడుదలతో లోతట్టు ప్రాంతాలు జలమయమయ్యాయి.
ఏలూరులో తమ్మిలేరు వాగు ఉద్ధృతంగా ప్రవహిస్తోంది. తమ్మిలేరు వాగుకు పలుచోట్ల గండ్లు పడి.. వరద నీరు ఏలూరులోకి చేరుతోంది. లోతట్టు ప్రాంతాలు మునిగిపోయాయి. ప్రజలను పునరావాస కేంద్రాలకు తరలిస్తున్నారు.