లాక్డౌన్ వల్ల సమస్తం స్తంభించిపోవటం వల్ల అనేక మంది నిత్యావసరాల కోసం ఇబ్బందులు పడుతున్నారు. అలాంటి వారి కోసం దాతలు, స్వచ్ఛంద సంస్థలు ఆహారం, కూరగాయలు పంపిణీ చేస్తూ వారి ఆకలి తీర్చుతున్నారు. పశ్చిమగోదావరి జిల్లా పెదవేగి మండలం న్యాయంపల్లి గ్రామంలో కొందరు విరాళాలు వేసుకుని ఒక్కో కుటుంబానికి 7 కేజీల చొప్పున కూరగాయలు పంపిణీ చేశారు.
తణుకు పట్టణ పరిధిలోని వివిధ వార్డు వాలంటీర్లకు శాసనసభ్యులు కారుమూరి వెంకట నాగేశ్వరరావు కూరగాయలు, బియ్యం పంపిణీ చేశారు. ఈ సందర్భంగా నియోజకవర్గ పరిధిలోని వాలంటీర్లు నిర్వహిస్తున్న పాత్ర అభినందనీయమని ఎమ్మెల్యే కొనియాడారు.
లాక్డౌన్ కారణంగా కష్టాల్లో ఉన్న పేదలను ఆదుకునేందుకు రాష్ట్ర వ్యాప్తంగా తెదేపా నేతలు, కార్యకర్తలు వివిధ కార్యక్రమాలు చేస్తున్నారు. గుంటూరు జిల్లా వట్టిచెరుకూరు మండలం లేమల్లెపాడు గ్రామంలో ప్రజలకు, మిర్చి కోతలకు వచ్చిన వలస కూలీలకు గ్రామ తెదేపా అధ్యక్షుడు పాతూరి కృష్ణారావు, కార్యకర్తలతో కలిసి కూరగాయలను ఇంటింటికి పంపిణీ చేశారు.