తనను, తన భార్యను, కుమార్తెను కిడ్నాప్ చేసి హైదరాబాద్ తీసుకెళ్లేందుకు కొందరు యత్నించారంటూ తాడేపల్లిగూడెంకు చెందిన శివప్రసాద్ అనే వ్యక్తి గురువారం చింతలపూడి పోలీసులకు ఫిర్యాదు చేశాడు. ఆర్థిక లావాదేవీల తగాదాలతో తనను చంపాలని చూస్తున్నారని ఆరోపించాడు. అతను తెలిపిన వివరాలిలా ఉన్నాయి.
తాడేపల్లిగూడెంకు చెందిన శివప్రసాద్, అతని భార్య షాజా, మూడేళ్ల కుమార్తెను కొందరు వ్యక్తులు బుధవారం రాత్రి బలవంతంగా కారులో ఎక్కించుకుని హైదరాబాద్ తీసుకెళ్లే ప్రయత్నం చేశారు. ఈ క్రమంలో చింతలపూడి మండలం ఫాతిమాపురం సమీపంలో బహిర్భూమికి వెళ్లి వస్తానని చెప్పి శివప్రసాద్ తప్పించుకున్నాడు. అక్కడి నుంచి పరిగెత్తుకుంటూ చింతలపూడి పోలీసుస్టేషన్కు వచ్చాడు. జరిగిన విషయాన్ని పోలీసులకు తెలిపాడు. అనంతరం సంఘటనా స్థలానికి చేరుకున్న పోలీసులు... కారుతో పాటు అనుమానితులను అదుపులోకి తీసుకున్నారు. కిడ్నాప్ చేసేందుకు యత్నించిన వాళ్లకు, తనకు మధ్య ఆర్థిక లావాదేవీల విషయంలో గొడవ ఉందని శివప్రసాద్ చెప్పాడు. ఈ విషయంపై హైదరాబాద్లో కేసు నడుస్తోందని వెల్లడించాడు. ఈ క్రమంలో తమను బలవంతంగా హైదరాబాద్ తరలించే ప్రయత్నం చేయటంతో పోలీసులకు ఫిర్యాదు చేశామన్నాడు.