విజయనగరం జిల్లా చింతలవలస పీవీజీ రాజు ఏసీఏ స్పోర్ట్స్ కాంప్లెక్స్ మైదానంలో జరిగిన ఆంధ్రా క్రికెట్ అసోసియేషన్ మహిళా టీ-20 ప్రీమియర్ లీగ్ ఫైనల్ మ్యాచ్లో విజయనగరం రాయల్స్ విజయం సాధించింది. ఫైనల్లో వైజాగ్ డాల్ఫిన్స్ జట్టును రాయల్స్ ఓడించారు. ఈ మ్యాచ్కు క్రీడాశాఖమంత్రి రోజా, శాప్ ఛైర్మన్ బైరెడ్డి సిద్ధార్థ రెడ్డి ముఖ్య అతిథులుగా హాజరయ్యారు. గెలుపొందిన జట్టుతో పాటు రన్నరప్ జట్టుకు మంత్రి రోజా, బైరెడ్డి సిద్ధార్థ రెడ్డి బహుమతులను అందజేశారు. ఈ సందర్బంగా మంత్రి రోజా మాట్లాడుతూ..లీగ్లో పాల్గొన్న ప్రతీ ఒక్కరూ విన్నరే అని అన్నారు. మహిళలు భవిష్యత్ తరాలకు ఆదర్శంగా నిలవాలని ఆకాంక్షించారు. ఆడ పిలల్లు ఆత్మాభిమానంతో ముందుకు వచ్చి సమాజంలో తమకంటూ ప్రత్యేక స్థానాన్ని ఏర్పాటు చేసుకోవాలన్నారు.
మహిళలకు క్రీడల పరంగా సరైన ఆదరణ లేక ఇబ్బంది పడుతున్న తరుణంలో సీఎం జగన్ ఇలాంటి టోర్నమెంట్ ఉండాలని ఆదేశించారని రోజా వెల్లడించారు. వెనువెంటనే ఏసీఏ ఈ టోర్నమెంట్ ఏర్పాటు చేసిదంని తెలిపారు. ఏసీఏ సపోర్ట్తో ఆంద్రాకు చెందిన కల్పన, మేఘన, స్నేహ ఇండియా టీమ్కు ఎంపికయ్యారని తెలిపారు. మరికొంత మంది కూడా ఇండియా టీమ్కి ఆడాలని కోరుతున్నామన్నారు.